ދިވެހި ޒުވާނުނަށް ބަސް ނުބުނެވޭނެކަމެއް އަދުގެ ސަރުކާރުގައި ނޯންނާނޭ ކަމަށާއި، ޤައުމީ ލަފާދޭ ކޮމިޓީން ހުށަހަޅާ ކަންކަން ބަލައިގަންނާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ.
ދިވެހި ޒުވާނުންގެ ޤައުމީ ލަފާދޭ ކޮމިޓީ މިއަދު އިފްތިތާހްކުރުމަށްފަހު ބޭއްވި އެ ކޮމިޓީގެ ފުރަތަމަ ބައްދަލުވުމުގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ޒުވާނުންގެ ފަރާތުން ދައުލަތް ހިންގުމުގައި އަދި ދައުލަތުގެ އެހެނިހެން ކަންކަން ބައްޓަން ކުރުމުގައި ބަސް އިއްވައި، އެމަނިކުފާނަށް ލަފާދޭ ކޮމިޓީއެއް އުފެދިގެން އައުމަކީ ވަރަށް އުފާކުރައްވާ ކަމެއް ކަމަށެވެ.
ރައީސް ޑރ.މުޢިއްޒު ވިދާޅުވީ، ދިވެހި ރާއްޖޭގެ އިމުގެ ތެރޭގައި ހިނގާ ކޮންމެ ކަމެއްގައިއާއި، އެމަނިކުފާނުގެ ގާނޫނީ ޒިންމާ އަދާކުރުމުގައި އެ ކޮމިޓީން ލަފާދެއްވޭނެ ކަމަށެވެ. އަދި މިނިވަން ހިޔާލުގައި، ވަކި ވިސްނުމެއް ނެތި، އެހެން މީހަކު ވަކި ގޮތަކަށް ކަމެއް ކުރަން ބުނެފައިނުވާ ހާލަތްތަކުގައި މަސައްކަތްކުރުމުގެ ފުރުސަތު އެ ކޮމިޓީގެ މެމްބަރުންނަށް އޮތްކަން ރައީސް ޑރ.މުޢިއްޒު ފާހަގަކުރެއްވިއެވެ.
ގައުމުގެ އާބާދީގެ އެންމެ ބޮޑު އިއްސަތައެއް ހިއްސާ ކުރަނީ ޒުވާނުންކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، ޒުވާނުންގެ ފަރާތުން ގައުމުގެ ކަންކަމާއި މެދު ބަސް އިއްވުމަކީ ލިބިގެންދާނެ ފަސޭހައެއް ކަމަށެވެ.
އަޅުގަނޑުދޭ ޔަގީންކަމަކީ މިގޮތަށް އަޅުގަނޑަށް ހުށަހަޅާ ކަންކަން އަޅުގަނޑު ބަލައިގަންނާނަމޭ. އިރާދަކުރެއްވިއްޔާ ވީވަރަކުން އެންމެ ރަނގަޅަކަށް އެކަންކަން ރާއްޖޭގައި ތަންފީޒު ކުރުމަށް ކަންކަން ފަހި ކުރާނަން"
ރައީސް ޑރ.މުޢިއްޒު ވިދާޅުވިއެވެ.
މިއީ ވަރަށް ހަރަކާތްތެރި ކަމާއި އެކު ބިނާކުރަނިވި މަސައްކަތްތަކެއް ލިބޭ ފުރުސަތެއްކަން ރައީސް ޑރ.މުޢިއްޒު ވަނީ ހަނދުމަކޮށްދެއްވާފައެވެ. އަދި ހުރިހާކަމަކަށް ވެސް ހިޔާލުދެއްވުމަށް ވެސް ކޮމިޓީގެ މެމްބަރުންގެ ކިބައިން ރައީސް ޑރ.މުޢިއްޒު އެދިވަޑައިގެންނެވިއެވެ.
Advertisement
This content is created and paid for by advertisers and does not involve Voice Journalists
