އޯކޭޒް އިންކް އާއި މީޑިއާނެޓް ގުޅިގެން ގެނެސްދިނުމަށް ހަމަޖެހިފައިވާ އާ ޕްރޮޖެކްޓް "ރޮބޮމޭން- ދަ މޫވީ" ގެ ޕޯސްޓަރު ދައްކާލައިފިއެވެ.

މިއީ މަހުދީގެ އުފެއްދުންތެރި ސްކްރީން ޕްލޭގެ މައްޗަށް ބިނާ ކޮށް އުފައްދާ ފިލްމެެކެވެ.

ރާއްޖޭގެ ކުދި ބޮޑު އެންމެންގެ ލޯބި ހޯދާފައިވާ ރޮބޮމޭން ކެރެކްޓާގެ މައްޗަށް ބިނާކޮށް ކެންޑި އާއި މުންކޯ ޑައިރެކްޓް ކުރާ މި ފިލްމަކީ ފޯރިގަދަ ފިކްޝަނަލް އެޑްވެންޗަރ އެއް ހިމެނޭ، ހުރިހާ އުމުރެއްގެ މީހުންނަށް ވެސް އެކަށީގެންވާ ގޮތަށް އުފައްދާ ފިލްމެެކެވެ.

މި ފިލްމުގެ ޕޯސްޓަރު ދައްކާލުމަށް އަންގާރަދުވަހުގެ ރޭ ވަނީ ވައިޓް ރޫފްޓޮޕްގައި ފިލްމީދާއިރާގެ މަގްބޫލު ގިނަ ތަރިންތަކެއްތަކަކާއި އެކު ވަނީ ހާއްސަ ހަފްލާއެއް ބާއްވާފައެވެ. މި ހަފްލާގައި 100 އަށްވުރެ ގިނަ ކުދިންނާއެކު ކުރިއަށް ދިޔަ އޮޑިޝަންތަކަށް ފަހު ރޮބޯމޭން އާއި އެކު މިފިލްމުގައި އިސްރޯލުތަކުގައި އެކްޓުކުރުމަށް ހޮވުނު ދެކުދިން ކަމަށްވާ  އަމީލިއާ ނަސްރުﷲ ޝަކީބު އަދި މިޝާ އިސްމާއިލް ނިޔާޒް ވެސް ވަނީ ފެނިފައެވެ.

މި ދެކުދިންގެ އިތުރުންވެސް އެކި ރޯލުތަކުން ގިނަ ކުދިންތަކެއް މި ފިލްމުން ފެނިގެންދާނެއެވެ.

މި ފިލްމުގައި ކެމިއޯ ރޯލުތަކުން ފެނިގެންދާ ފިލްމީ ދާއިރާ ގެ ފުންނާބު އުސް ދެ ފަންނާނުންކަމަށްވާ  މަރިޔަމް އައްޒަ އަދި ރަވީ ފާރޫގް، މި ހަފްލާގެ ތެރެއިން ޕްރޮޖެކްޓް އެގްރީމަންޓްގައި ސޮއިކޮށްފައިވާއިރު، ފިލްމުގައި ސްޕޮންސަރުންގެ ގޮތުގައި ބައިވެރިވާ ފަރާތްތައް ވެސް ވަނީ މި ހަފްލާގެ ތެރެއިން ސޮއިކޮށްފައެވެ.

 ޙަފްލާގެ ބައިވެރިންނަށް މި ފިލްމުގެ ޙާއްސަ ޓީޒަރ ޓްރެއިލާރ އެއް ދައްކާލާފައިވާއިރު، މި ފިލްމުގެ އެންމެ ފަހުގެ އަޕްޑޭޓްތައް "ރޮބޯމޭން – ދަ މޫވީ" އިންޓްސްޓަގްރާމް ޕޭޖުން ފެންނާނެއެވެ.

 26 ސެޕްޓެމްބަރު 2024 ގައި  އޮލިމްޕަސް ސްކްރީނުގައި ރިލީޒްކުރުމަށް ހަމަޖެހިފައިވާ މި ފިލްމް މީޑިއާނެޓުގެ ވީޑިއޯކްލަބް މެދުވެރިކޮށް ބެލުންތެރިންނަށް ޓީވީ އަދި ފޯނު މެދުވެރިކޮށް މި އަހަރު ފަހުކޮޅު ބަލާލެވޭނެއެވެ.