މާލޭ ބާޒާރުގައި ލުނބޯ ކިލޯއެއްގެ އަގު ވަރަށްބޮޑަށް އުފުލިއްޖެއެވެ.

ބާޒާރުމަތީގައި މިއަދު ލުނބޯ ވިއްކަންހުރި އަގުތަކަށް ބަލާއިރު، ލުނބޯ ކިލޯއެއްގެ އަގު ވަނީ 120 ރުފިޔާއަށް މައްޗަށް ގޮސްފައެވެ. ބާޒާރުގައި މިއަދު އެންމެ އަގުހެޔޮކޮށްވެސް ލުނބޯ ކިލޯއެއް ލިބެންހުރީ 90 ރުފިޔާއަށެވެ. 

ބާޒާރުގައި ލުނބޯ ކިލޯއެއްގެ އަގު 120 ރުފިޔާއަށް އުފުލިފައިވާއިރު، މީގެ ހަފްތާއެއްކުރިން ލުނބޯ ކިލޯއެއް 35 ރުފިޔާއަށްވެސް ވިއްކިއެވެ. ވޮއިސް އާ ވާހަކަދައްކަމުން ބައެއް ގޮޅިތަކުގެ ސޭޓުން ބުނީ، ލުނބޯގެ އަގު ބޮޑުވީ ލިބޭ އަދަދުވެސް މަދުވުމާ ގުޅިގެންކަމަށެވެ. މިގޮތުން މޫސުން ގޯސްވުމުން ކަނޑުމަގުން ލުނބޯ ލިބުމުގައި ދަތިތަކެއް އުޅޭކަމަށް ބައެއް ސޭޓުން ބުންޏެވެ.

Advertisement

މާލޭ ބާޒާރުގައި މީގެ އަހަރެއްހާ ދުވަސްކުރިންވެސް އުފުލުނެވެ. އޭރު 30 ރުފިޔާއަށް ވިއްކި ލުނބޯ ކިލޯގެ އަގު 100 ރުފިޔާއަށް އުފުލުނެވެ. މިފަހުން މިދިޔަ ރަމަޟާންމަހުވެސް ލުނބޯގެ އަގު އުފުލުނެވެ. އެފަހަރު ލުނބޯގެ އަގު ސަރުކާރުން ކޮންޓްރޯލްކުރީ އެސްޓީއޯ މެދުވެރިކޮށް ލުނބޯ ގެނެސްގެންނެވެ.

މާލޭ ބާޒާރުމަތީ ފިހާރައެއްގައި ވިއްކަން ބަހައްޓާފައި ހުރި ތަރުކާރީ... ފޮޓޯ/ ވޮއިސް

ލުނބޯގެ އިތުރުން މާލޭ ބާޒާރުގައި ކެރެޓާއި ތަރުކާރީގެ އިތުރު ބާވަތްތަކުގެ އަގުތައްވެސް ވަނީ އުފުލިފައެވެ. މާލޭ ބާޒާރުގައި ގިނަ ފަހަރަށް ތަކެތީގެ އަގުބޮޑުކުރަނީ އެ އެއްޗެއް ލިބުން ދަތިވުމުންނެވެ.

ނަމަވެސް ބާޒާރުގައި ތަކެތި މަދުވުމަކީ އަގުބޮޑުވާންޖެހޭ ސަބަބެއް ނޫންކަމަށް ބައެއް މީހުން ބުނެއެވެ. ހާއްސަކޮށް އާއްމު ދިރިއުޅުމުގައި ބޭނުންކުރާ ކާބޯތަކެތީގެ ބާވަތްތަކެވެ.