އާސަންދަ ނިޒާމު ރިފޯމުކުރުމަށް ކުރާ މަސައްކަތުގެ ތެރެއިން އަންނަ އޮކްޓޫބަރު މަހުން ފެށިގެން އާސަންދައިގެ ދަށުން ހިލޭ ބޭސްފަރުވާ ކޮށްދޭނީ އެމީހާގެ އިތުރު އިންޝުއަރެންސް ސްކީމެއްގައި ބައިވެރިވެފައިވާނަމަ އެއަށް ކެނޑުމަށްފަހު  އެންސްޕާގެ ސީއީއޯ ހީނާ ވަލީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ އިޖުތިމާއީ ކޮމިޓީން މިއަދު ބޭއްވި ބައްދަލުވުމުގައި ވާހަކަފުޅު ދައްކަވަމުން ހީނާ މިފަދައިން ވިދާޅުވީ، ބައިވެރިވެފައިވާ މީހުންނަށް ވެސް އާސަންދަ ލިބޭތީ އެކަމާ ގުޅިގެން މެމްބަރަކު ކުރެއްވި ސުވާލަކަށް ޖަވާބުދެއްވަމުންނެވެ.

މިގޮތުން ހީނާ ވިދާޅުވީ،  އަންނަ އޮކްޓޫބަރުގައި އާސަންދަ ނިޒާމު ރިފޯމުކޮށް، ތަންފީޒު ކުރަން ފެށުމުން ޑަބަލް އިންޝުއަރެންސަސް ކެނޑުމަށްފަހު، އާސަންދައިގެ ބަދަލުގައި އެންމެ ފުރަތަމަ ކަނޑާނީ އެ މީހުންގެ އަތުގައި ހުންނަ އިތުރު އިންޝުއަރެންސް ތަކުން ކަމަށެވެ.

Advertisement

ހީނާ ވިދާޅުވީ އާސަންދައިގެ ޕޮލިސީއަށް ގެންނަ ބަދަލު ތަކުގެ  ޑްރާފްޓްތަކެއް ވަރަށް އަވަހަށް ކެބިނެޓަށް ހުށަހަޅާނެ ކަމަށާއި، މިއީ އެންމެ ބޮޑަށް ބޭނުންވާ މީހުންނަށް އެންމެ ބޮޑު އެހީތެރިކަމެއް ދެވޭނެ ގޮތަކަށް ނިޒާމު ބަދަލުކުރުމަށް ކުރާ މަސައްކަތުގެ ދަށުން ގެންނަ ބަދަލުތަކެއް ކަމަށެވެ.