2012 ވަނަ އަހަރުގެ ފަހުން ފުރަތަމަ ފަހަރަށް"ގެމްޕަރ ޓްރޮފީ" މެޗުން ބާސެލޯނާ ބަލިވެއްޖެއެވެ. ހޯމަދުވަހުގެ ރޭ ބާސެލޯނާގެ ދަނޑުގައި ފްރާންސް މޮނާކޯ ދެކޮޅަށް ކުޅުނު މެޗުން އެޓީމު ބަލިވީ 3-0 ގެ ނަތީޖާއަކުންނެވެ.

މި މުބާރާތަކީ ބާސެލޯނާގެ ކުރީގެ ރައީސް ޖޯން ގެމްޕަރގެ ޝަރަފުގައި 1966 ވަނަ އަހަރުން ފެށިގެން ކޮންމެ އަހަރެއްގެ އޮގަސްޓް މަހު ބާއްވަމުން އަންނަ ޕްރީ ސީޒަން ފްރެންޑްލީ މުބާރާތެކެވެ. އަދި 1996 ވަނަ އަހަރާއި ހަމައަށް މުބާރާތް ކުޅެމުން އައީ ހަތަރު ޓީމު މެދުގައި ސެމީ ފައިނަލް ދެމެޗު ކުޅުމަށްފަހު ފައިނަލް ކުޅޭ ގޮތަށެވެ.

ނަމަވެސް 1997 ވަނަ އަހަރުން ފެށިގެން މިމުބާރާތުގައި ދެޓީމު ވާދަކުރަމުން އަންނައިރު، ކޮންމެ އަހަރަކުވެސް އެއްކޮޅުން ވާދަކުރަނީ ބާސެލޯނާ އެވެ. އަދި ދެވަނަ ޓީމަކީ ބާސެލޯނާ އިން ދައުވަތުދޭ ޓީމެކެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި މޮނާކޯއިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފު ފެށިގެން ފަސްވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު އެޓީމަށް ކާމިޔާބުކޮށްދިނީ ޒުވާން މިޑްފީލްޑަރު ލަމީން ކަމާރާ އެވެ. އަދި އޭގެ ހަތް މިނެޓް ފަހުން އެޓީމުގެ ފޯވާޑް ބްރީލް އެންބޯލޯ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. އަދި މިމެޗުގައި އެޓީމުން ކާމިޔާބުކުރި ތިންވަނަ ލަނޑު ދެވަނަ ހާފުގެ 86 ވަނަ މިނެޓުގައި ކާމިޔާބުކޮށްދިނީ ޒުވާން ޑިފެންޑަރު ކްރިސްޓިއަން މާވިސާ އެލެބައީ އެވެ.

ބާސެލޯނާ އިން މިމުބާރާތުގެ ޗެންޕިއަންކަން 46 ފަހަރު ހޯދާފައިވާއިރު، މިއީ 2012 ވަނަ އަހަރު އިޓަލީގެ ސަމްޕޯރިއާ އަތުން 1-0 ގެ ނަތީޖާއަކުން ބަލިވި ފަހުން ގެމްޕަރޓްރޮފީ މެޗުން ބާސެލޯނާ ބަލިވި ފުރަތަމަ ފަހަރެވެ.