ތެލެސީމިއާގެ މައްސަލައަށް ރާއްޖޭގެ ތާރީހުގައިވެސް ނުދޭ އިސްކަމެއް މި ސަރުކާރުން ދެއްވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ތެލެސީމިއާ ބަލި ކޮންޓްރޯލް ކުރުމަށް އެކުލަވާލި 10 އަހަރުގެ މާސްޓަރ ޕްލޭނާ ބެހޭގޮތުން ކަމާ ގުޅޭ ފަރާތްތަކާއެކު މަޝްވަރާ ކުރެއްވުމަށް ބޭއްވި ވޯކްޝޮޕްގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، މި ޕްލޭނަކީ މުހިންމު ޤައުމީ މަސައްކަތެއް ކަމަށާއި ތެލެސީމިއާގެ މައްސަލަ އަކީ ޤައުމީ މުހިންމު މައްސަލައެއް ކަމަށެވެ.
"ސަރުކާރުގެ ކަމާ ބެހޭ ފަރާތްތަކުން ރައްޔިތުންނަށް ފޯރުކޮށްދެއްވާ މައުލޫމާތަށް ބަލާއިރު، ތެލަސީމިއާގެ ހިތްދަތިކަން ތަހައްމަލު ކުރަމުންދާ ފަރާތްތަކަށް ރާއްޖޭގެ ތާރީހުގައިވެސް ދެވިފައިނުވާފަދަ އިސްކަމެއް މި ސަރުކާރުން އެބަދެއްވާ،"
މެޑަމް ސާޖިދާ ވިދާޅުވިއެވެ.
ތެލަސީމިއާ އަށް ފަރުވާ ދިނުމަށްޓަކައި ބޭނުންވާ އިންތިޒާމްތައް ސަރުކާރުން ހަމަޖައްސަވަމުންދާކަން ފާހަގަކުރައްވަމުން މެޑަމް ސާޖިދާ ވިދާޅުވީ، މިސަރުކާރުން އެޅުމަށް ހަމަޖެހިފައިވާ ތެލަސީމިއާ ހޮސްޕިޓަލަކީ ތެލަސީމިއާ ބައްޔާއި ގުޅޭ އެކި އެކި ފަރުވާތައް ލިބުމުގައި ލުއި ފަސޭހަ ގޮތްތައް ހިމެނޭހެން ގާއިމު ކުރެވޭ މަތީ ފެންވަރުގެ ހޮސްޕިޓަލެއް ކަމަށެވެ. އަދި ތެލަސީމިއާ އަށް ފަރުވާ ކުރުމަށް ބޭނުންވާ ބޭސް ލިބޭނެ ލުއި ފަސޭހަ ގޮތްތައް ހަމަޖައްސަވާފައިވާކަން ވެސް އެކަމަނާގެ ވާހަކަފުޅުގައި ފާހަގަކުރެއްވިއެވެ.
މެޑަމް ސާޖިދާ ވިދާޅުވީ، ސަރުކާރުން މިކަމަށް ދޭ ޚާއްސަ އިސްކަމުގެ ދަށުން ވޭތުވެދިޔަ 8 މަސް ދުވަހުގެ ތެރޭގައި 14 ކުދިން ބޯންމެރޯ ހަދަން ފޮނުވާފައިވާކަމަށާއި، އޭގެ ތެރެއިން އެއް ކުއްޖަކު ފަރުވާއަށް ފަހު އެނބުރި ރާއްޖެ އައިސްފައިވާކަމަށެވެ.
މިއީ ލިބޭ ވަރަށް ބޮޑު ހިތްހަމަ ޖެހުމެއް ކަމަށާއި، މިކަމަށް ބޭނުންވާ އެންމެ ޒަމާނީ ޓެކްނޮލޮޖީއާއި ފަރުވާއަށް ބޭނުންވާ މަތީ ފެންވަރުގެ އިންތިޒާމުތައް މި ސަރުކާރުން ހަމަޖައްސަމުންދާކަމަށް މެޑަމް ސާޖިދާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
