ދާދިފަހުން ބަންގްލަދޭޝްގައި ހިނގި ސިޔާސީ ހަމަނުޖެހުންތަކުގެ ތެރޭގައި އެގައުމުގައި ޒަމާންތަކެއް ވަންދެން ވެރިކަން ކުރައްވަމުން ގެންދެވި ޝެއިޚް ހަސީނާގެ ވެރިކަން ނިމުމަކަށް ވަނީ ގެނެސްފައެވެ.

ސަރުކާރާއި ދެކޮޅަށް ހިނގި ހަމަނުޖެހުންތަކުގައި އެތައް ބަޔަކު މަރުވެފައިވާއިރު، މިހަމަނުޖެހުންތަކުގެ ސަބަބުން އެގައުމުގެ އިގްތިސާދަށްވެސް އެކަމުގެ ނޭދެވޭ އަސަރު ވަނީކޮށްފައެވެ. އަދި މިހާރުވެސް އިގްތިސާދީ ލޮޅުންތައް އަންނަމުންދާއިރު، ކުރިއަށް އޮތީވެސް ބަނަ ދުވަސްތަކެއް ކަމަށް ތަޖުރިބާކާރުން އަންދާޒާކުރެއެވެ.

ފޮރިން އިންވެސްޓަރސް ޗެމްބަރ އޮފް ކޮމަރސް އެންޑް އިންޑަސްޓްރީސް އިން އަންދާޒާކުރާ ގޮތުގައި މިހަމަނުޖެހުންތަކުގައި ލިބުނު މާލީ ގެއްލުމުގެ އަގު 10 ބިލިއަން އެމެރިކާ ޑޮލަރަށްވުރެ މައްޗަށް އަރާނެއެވެ.

މީގެ ދެތިން އަހަރުކުރިން ބަންގްލަދޭޝްގައި އުފާފާޅުކުރަމުން އައީ އެގައުމުގައި ބޮލަކަށް ޖެހޭ އާމްދަނީގެ ނިސްބަތް އިންޑިއާގައި ޖެހޭ ނިސްބަތަށްވުރެ މައްޗަށް ގޮސްގެންނެވެ. އެހެންނަމަވެސް މިއަދުގެ ހާލަތު މިވަނީ ބަދަލުވެފައެވެ.

ގައުމެއްގައި ސިޔާސީ ހަމަނުޖެހުން އިތުރުވުމަކީ އޭގެ ސަބަބުން އިންވެސްޓްމަންޓްތަ ބޭރުގެ އިންވެސްޓަރުންނަށް ހުރަސްއެޅިދާނެ ކަމެކެވެ. ކުންފުނިތަކުން އިންވެސްޓްމަންޓް ޕްލޭންތައް ލަސްވެ ނުވަތަ ކެންސަލްކޮށް، ބޭރުގެ ރައުސުލްމާލު އައުން މަދުވެދާނެއެވެ.

އިންވެސްޓްމަންޓްތައް ލަސްވުމުން ނުވަތަ މަދުވުމަކީ އިޤްތިޞާދީ ކުރިއެރުން މަޑުޖެހި، ވަޒީފާ އުފެއްދުމާއި އާމްދަނީގެ ފެންވަރަށް އަސަރުކުރާ ކަމެކެވެ. ބަންގްލަދޭޝްގެ އެކި އިންޑަސްޓްރީތަކަށް އަމާޒުކޮށް އެގައުމަށް ފޮރިން އިންވެސްޓްމަންތްތައް އަންނަމުންދާ މިދަނޑިވަޅުގައި ފޮރިން އިންވެސްޓްމަންޓްތައް ހުއްޓިގެން ހިނގައްޖެނަމަ އިގްތިސާދު ކުރިއެރުން ބޮޑުތަނުން މަޑު ޖެހުނީއެވެ.

ދެން އޮތީ އެކަމެއްގެ މައްޗަށް ބަންގްލަދޭޝްގެ އިގްތިސާދު ވަރަށް ބޮޑަށް ބިނާވެފައިވާ އެކްސްޕޯޓަށް ކުރާ އަސަރެވެ. މުޒާހަރާތަކާއި ހަޅުތާލުތަކުގެ ސަބަބުން ސަޕްލައި ޗޭނަށް ބުރޫއަރާ، މުދާ ވަގުތުން ޑެލިވަރީ ކުރުމަށް އަސަރު ފޯރުވައެވެ. ބަންގްލަދޭޝްގެ އިގްތިސާދު ވަރަށް ބޮޑަށް ބަރޯސާވެފައިވަނީ ޓެކްސްޓައިލް އެކްސްޕޯޓް ކުރުމަށެވެ.

2011 ވަނަ އަހަރު ބަންގްލަދޭޝްއިން 14.6 ބިލިއަން ޑޮލަރުގެ މުދާ އެކްސްޕޯޓްކުރި އިރު، 2019 ވަނަ އަހަރު 33.1 ބިލިއަން ޑޮލަރުގެ ޓެކްސްޓައިލް މުދާ އެކްސްޕޯޓްކުރިއެވެ. މިދިޔަ 5 އަހަރުވެސް މި އަދަދު ވަނީ ބޮޑުތަނުން މައްޗަށް ޖެހިލާފައެވެ. އަންދާޒާކުރެވޭ ގޮތުގައި އެކްސްޕޯޓް ސެކްޓަރއަށް މިހާތަނަށް 4 ބިލިއަން ޑޮލަރުގެ ގެއްލުން ވަނީ ލިބިފައެވެ.

ޓެކްސްޓައިލް އިންޑަސްޓްރީ އަލުން އެނބުރި އައިނަމަވެސް، ސަޕްލައިޗެއިން އަށް އެރި ބުރޫތަކުގެ ސަބަބުންނާއި، ބަންގްލަދޭޝްގެ އަގުހެޔޮ މުދަލަށް ބަރޯސާވެފައިވާ ބައިނަލްއަގްވާމީ މާކެޓުން އިތުރު އެހެން ގޮތަށް ހޯދަން އުޅެފައިވުމުގެ ސަބަބުން އިންޑަސްޓްރީއަށް ކުރި އަސަރު ފެންނާނީ އަދި މަސްތަކެއް ފަހުންނެވެ.

ބަންގްލަދޭޝްއަކީ ފަތުރުވެރިކަމުގެ މަންޒިލެއްގެ ގޮތުގައި މަޝްހޫރު ގައުމެއް ނޫނެވެ. އެހެން ނަމަވެސް، ކޮވިޑްގެ ކުރިން އެގައުމަށް އައި ފަތުރުވެރިންގެ އަދަދަށްވުރެ މިދިޔަ އަހަރު އައި ފަތުރުވެރިންގެ އަދަދު ގިނަކަމަށް ބަންގްލަދޭޝް ޓޫރިޒަމް ބޯޑުން ބުނެއެވެ. ރެކޯޑްތައް ދައްކާ ގޮތުން މިދިޔަ އަހަރު 6 ލައްކައަށްވުރެ ގިނަ ފަތުރުވެރިން ބަންގްލަދޭޝްއަށް ޒިޔާރަތްކުރިއެވެ.

ބައިނަލްއަގްވާމީ މީޑިއާތަކުން ހަމަނުޖެހުންތައް ކަވަރުކުރުމުން ފަތުރުވެރިން ފަސްޖެހި، ފަތުރުވެރިކަމުގެ ދާއިރާއިން ބަންގްލަދޭޝްއަށް ލިބޭ އާމްދަނީއަށް އަސަރުކުރާނެއެވެ. މިއަސަރު ހޮޓާތަކާއި ރެސްޓޯރެންޓްތަކާއި ދަތުރުފަތުރާއި މިނޫންވެސް ގުޅުންހުރި ސިނާއަތްތަކަށްވެސް ކުރެއެވެ. އަދި ހަމައެއާއެކު ބަންގްލަދޭޝް އަކީ ނުރައްކާތެރި، ހަމަނުޖެހުން ބޮޑު މަންޒިލެއްގެ ގޮތުގައި ފަތުރުވެރިން އަދި މީޑީއާއިން ދެކެން ފަށައިފިނަމަ ބަންގްލަދޭޝްގެ ފަތުރުވެރިކަމާއި އަދި ޖުމްލަކޮށް އިގްތިޞާދަށް ދިގުދެމިގެންދާ އަސަރުތަކެއް ކޮށްފާނެއެވެ.

ބޮޑުވަޒީރު އިސްތިއުފާ ދެއްވިނަމަވެސް ބަންގްލަދޭޝްގައި އަދިވެސް ފުރިހަމައަށް ހަމަޖެހުން ގާއިމެއް ނުވެއެވެ.

ވަގުތީ ސަރުކާރެއް އެކުލަވާލައި، އެސަރުކާރުގެ ވެރިއަކަށް މައިކްރޯފައިނޭންސިންގ ދާއިރާގެ ތަޖުރިބާކާރެއް އައްޔަން ކުރިނަމަވެސް، ނަތީޖާ ފެންނާނީ އަދި އެތައް ދުވަހެއް ފަހުންނެވެ.