ޓެސްލާގެ ސީއީއޯ އަދި ދުނިޔޭގެ އެންމެ މުއްސަނދި މީހާ އީލޯން މަސްކް އެމެރިކާގެ ނައިބު ރައީސް އަދި ޑިމޮކްރެޓިކް ޕާޓީގެ ރިޔާސީ ކެންޑިޑޭޓް ކަމާލާ ހެރިސްއަށް އެކްސް ޕްލެޓްފޯމުގެ ސްޕޭސަސް މެދުވެރިކޮށް އިންޓަވިއު އެއް ކުރިއަށް ގެންދިއުމަށް ދަޢުވަތު ދީފިއެވެ.

މި ދަޢުވަތު މަސްކް ދީފައިވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕްއާއެކު ގާތްގަނޑަކަށް ދެ ގަޑިއިރުގެ އިންޓަވިއުއެއް ކުރުމަށްފަހުގައެވެ. ގިނަ ބަޔަކު މި އިންޓަވިއު އަށް "ގަރުނުގެ އިންޓަވިއު" މި ނަން ދީފައިވާއިރު، މަސްކްގެ ބުނުމުގައި މި މަޝްހޫރު އިންޓަވިއު އަށް މިހާތަނަށް 1 ބިލިއަން ވިއު ލިބިފައިވެއެވެ.

ކަމާލާ ހެރިސްއަށް ވެސް އެކްސް ސްޕޭސަސް މެދުވެރިކޮށް އިންޓަވިއު ދިނުމަށް ޝައުގުވެރިވާކަމަށް މަސްކް ބުނެފައިވާ ނަމަވެސް، އަދި މިކަމަށް ކަމާލާގެ ފަރާތުން ރަސްމީ ޖަވާބެއް ދީފައެއް ނުވެއެވެ. ނަމަވެސް ޓްރަމްޕްގެ އިންޓަވިއު ދެމުންދިޔައިރު، ހެރިސްގެ ކެމްޕޭން އިން "25 ޑޮލަރު ހަދިޔާކޮށް، އެމީހުންގެ ދޮގުތަކަށް ޖަވާބު ދިނުމަށް" އެދި ފަންޑްރެއިޒިންގ އީމެއިލްއެއް ފޮނުވާފައިވެއެވެ.

Advertisement

މި އީމެއިލްގައި ނައިބު ރައީސް ކަމާލާ ހެރިސް ވިދާޅުވެފައިވަނީ މަސްކްގެ "ގަނެފައިވާ ޕްލެޓްފޯމް" މެދުވެރިކޮށް ޓްރަމްޕްގެ "ނުބައި އެޖެންޑާ" މިލިއަނުން ގުނާ މީހުންނަށް ފަތުރަމުންދާ ކަމަށެވެ. އަދި "ދުނިޔޭގެ އެންމެ މުއްސަނދި މީހާއަކީ މާގާ ޓީމްގެ އަޅެއް" ކަމަށް ވެސް އޭނާ ވިދާޅުވެފައިވެއެވެ.

ޓްރަމްޕްއާއެކު ކުރި އިންޓަވިއު ނިންމާލަމުން، މަސްކް ވަނީ ޓްރަމްޕަށް އޭނާގެ ތާއީދު އަނެއްކާވެސް ފާޅުކޮށްފައެވެ. އަދި ޓްރަމްޕަކީ "ފާގަތިކަމުގެ މަގު" ކަމަށް ވެސް ބުނެފައިވެއެވެ. މީގެ ކުރިން އެމެރިކާގެ މީޑިއާތަކުން ރިޕޯޓުކޮށްފައިވަނީ މަސްކް ޓްރަމްޕަށް ތާއީދުކުރާ ޕޮލިޓިކަލް އެކްޝަން ކޮމިޓީއަކަށް 45 މިލިއަން ޑޮލަރު ހަދިޔާކުރަން ރޭވި ކަމަށެވެ. މިކަމަށް މަސްކް ދެކޮޅު ހަދާފައެއް ނުވެއެވެ.