ރ.މިދޫގައި މިހާރު ކުރިއަށްދާ "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގައި އަންގާރަ ދުވަހުގެ ރޭ ގުރޫޕް ބީގެ އެމަރަލްޑް ފާރުފުށި ރިސޯޓް އެންޑް ސްޕާއި، ޖޯލި މޯލްޑިވްސް ކުޅެން ތާވަލުކޮށްފައި އޮތް މެެޗު ނުކުޅެން ފާރުފުށިން ނިންމުމުން، މެޗުން ޖޯލި މޯލްޑިވްސް މޮޅުވިކަމަށް ނިންމައިފިއެވެ.

މީއާއެކު ތިން މެޗުން ލިބުނު ނުވަ ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ޖޯލި މޯލްޑިވްސް ސެމީފައިނަލުން ޖާގަ ހޯދިއިރު، ކުޅުން ތިން މެޗުން ލިބުނު ހަ ޕޮއިންޓާއެކު ގުރޫޕްގެ ދެވަނަ ޓީމުގެ ގޮތުގައި ސެމީގެ ދެވަނަ ޖާގަ ހޯދީ ހެރިޓެންސް އާރަށެވެ. އަދި މިގުރޫޕްގެ ތިންވަނަ ތިން މެޗުން ހޯދި ދެ ޕޮއިންޓާއެކު ރީތިފަރު ހޯދިއިރު ފާރުފުށިން މުބާރާތް ނިންމާލީ ތިން މެޗުން ލިބުނު އެއް ޕޮއިންޓާއެކު ގުރޫޕް ފުލުގައި އޮވެއެވެ.

މުބާރާތުގައި ޖޯލި މޯލްޑިވްސް ކުޅުނު ފުރަތަމަ މެޗުގައި ހެރިޓެންސް އާރަށް އަތުން ސީދާ ތިން ސެޓުން މޮޅުވެފައިވާއިރު، ދެވަނަ މެޗުގައި ރީތިފަރު އަތުން އެޓީމު މޮޅުވީވެސް ފަސޭހަކަމާއެކު ސީދާ ތިން ސެޓުންނެވެ. އަދި ފާރުފުށީގެ ފުރަތަމަ މެޗުގައި ވާދަވެރި ކުޅުމަކަށްފަހު ތިން ސެޓް ދެ ސެޓުން، ރީތިފަރު އަތުން ބަލިވިއިރު، ދެވަނަ މެޗުގައި އާރަށް އަތުން އެޓީމު ބަލިވީ ސީދާ ތިން ސެޓުންނެވެ.

Advertisement

މުބާރާތުގެ ސެމީފައިނަލް ފުރަތަމަ މެޗުގައި ގުރޫޕް އޭގެ އެއްވަނަ އަދި އެންމެ ފަހުގެ ޗެންޕިއަން ޖޯލި ބީންގ ނުކުންނާނީ ގުރޫޕް ބީގެ ދެވަނަ ހެރިޓެންސް އާރަށާއި ދެކޮޅަށެވެ. އަދި ސެމީފައިނަލުގެ ދެވަނަ މެޗުގައި ގުރޫޕް ބީގެ އެއްވަނަ ޖޯލި މޯލްޑިވްސް ނުކުންނާނީ ގުރޫޕް އޭގެ ދެވަނަ އަދި އެންމެ ފަހުގެ ރަނަރަޕް ކުޑަފުށި މޯލްޑިވްސް އާއި ދެކޮޅަށެވެ.

މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށްދަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭ ގޮތަށެވެ.

މީގެ އިތުރުން މިމުބާރާތުގެ ޓައިޓަލް ސްޕޮންސަރ އަކަށް މައިލޯ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.