ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން މާލޭގެ މަގުތަކުގެ ފެންވަރު ރަނގަޅުކުރުމަށް ކުރިއަށް ގެންދާ ޕްރޮޖެކްޓާއެކު ރައްޔިތުންގެ ތަކްލީފްތަކަށް ނިމުމެއް އަންނާނެ ކަމަށް އުއްމީދު ކުރައްވާ ކަމަށް މައްޗަންގޮޅި އުތުރު ދާއިރާގެ މެންބަރު އިބްރާޙީމް މުހައްމަދު (އިއްބެ ޖަނާބު) ވިދާޅުވެއްޖެއެވެ.

މުޅި ރާއްޖެއަށް، ހޯމަދުވަހުން ފެށިގެން ކުރަމުންދާ ވިއްސާރާގައި މާލޭގެ މަގުތަކުގެ ފެންބޮޑުވެ ވަރަށް 206 ގެއަށް އެމްއެންޑީއެފުން އެހީތެރިކަން ފޯރުކޮށްދީފައުވާ ކަމަށް އެ އިދާރާއިން ބުނެފައިވެއެވެ. 

އެއާއެކު ދާއިރާ ރައްޔިތުންގެ ހާލު އޮޅުންފިލުވުމަށް މެންބަރު އިއްބެ ވަނީ ދާއިރާގެ ގެތަކަށް އިއްޔެ ޒިޔާރަތް ކުރައްވާފައެވެ.

Advertisement

އެއަށްފަހު އެކްސްގައި ކުރެއްވި ޕޯސްޓެއްގައި އިއްބެ ވިދާޅުވީ، ފެންބޮޑުވާ ކޮންމެ ފަހަރަކު ފެންނަނީ ރައްޔިތުންގެ އެއްބައިވަންތަކަން ކަމަށެވެ. އަދި ބޭނުންޖެހޭ ކޮންމެ ވަގުތަކު އަވަށްޓެރިންނަށް އެހީތެރިވާތަން ކަމަށެވެ.

“އުއްމީދަކީ ރައީސް މުޢިއްޒުގެ ސަރުކާރުން މާލޭގެ މަގުތަކުގެ ފެންވަރު ރަނގަޅުކުރުމަށް ކުރިއަށް ގެންދާ ޕްރޮޖެކްޓާއެކު މި ތަކުލީފް އިސާހިތަކު ނިމުމެއް އައުން.” މެންބަރު އިއްބެ ވިދާޅުވިއެވެ.

މެމްބަރު އިއްބެ މިހެން ވިދާޅުވެފައި ވާއިރު، ވިއްސާރައިގައި ލިބޭ ގެއްލުން ކުޑަކުރުމަށް ކުރާ މަސައްކަތްތަކުގެ ތެރެއިން، މާލޭގެ ހުރިހާ މަގުތައް ރަނގަޅު ފެންވަރަކަށް ހެދުމަށް ފަށާ މަޝްރޫއުގެ އެންމެ މުހިންމު އެއް އަމާޒަކީ މާލޭގައި ފެންް ބޮޑުވުން ހައްލުކުރުން ކަމަށް ރައީސް މުއިއްޒު ވަނީ އިއްޔެ ވިދާޅުވެފައެވެ. 

"އެ މަޝްރޫއު ނިމިގެން ދާއިރު މާލޭގައި ޒަމާނުއްސުރެ ބޮޑުވެފައިވާ ފެެންބޮޑުމުގެ މައްސަލައަށް ދާއިމީ ހައްލެއް ލިބިގެންދާނެ. ހަމަ އެފަދައިން ރާއްޖޭގެ ގިނަ ރަށްތަކެއްގެ މަގުހެދުމުގެ މަޝްރޫއު ކޮންމެ އަހަރަކުވެސް ޕްލޭން ކޮށްފައިވާ ގޮތަށް، އިސްކަންދީގެން ކުރިޔަށް ގެންދެވުމުން އެ ރަށްރަށުގައިވެސް އެ ޙައްލު ލިބިގެންދާނެ،" ރައީސް ވިދާޅުވިއެވެ.