ޖަޕާނުގެ ބޮޑުވަޒީރު ފުމިއޯ ކިޝިދާ އަންނަ މަހު މަގާމުން އިސްތިއުފާ ދެއްވާނެކަމަށް އިއުލާނުކުރައްވައިފިއެވެ.
ކިޝިދާ ވިދާޅުވީ، މިއީ އެމަނިކުފާނުގެ ތިން އަހަރުގެ ދައުރުގައި ހިނގި ސިޔާސީ ހަމަނުޖެހުންތަކާއި އެގައުމުގެ ދިރިއުޅުމުގެ ހަރަދުތައް ބޮޑުވަމުންދިޔުމުގެ ސަބަބުން ރައްޔިތުންގެ ހިތްހަމަނުޖެހުން އިތުރުވެފައިވުމާ ގުޅިގެން ނިންމެވި ނިންމެވުމެއް ކަމަށެވެ.
ވެރިރަށް ޓޯކްޔޯގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ކިޝިދާ ވަނީ އޭނާ ނިސްބަތްވާ ޕާޓީ، ލިބަރަލް ޑިމޮކްރެޓިކް ޕާޓީ (އެލްޑީޕީ) ގެ ލީޑަރުކަމަށް ވެސް އަލުން ކުރިމަތިނުލާނެކަން އިއުލާނުކޮށްފައެވެ.
ކިޝިދާގެ މި ނިންމުމާއިއެކު، އެލްޑީޕީއަށް އައު ލީޑަރެއް ހޮވުމަށާއި، ޖަޕާނަށް އައު ބޮޑުވަޒީރެއް ހޮވުމަށް އަންނަ ސެޕްޓެމްބަރު މަހު އިންތިހާބެއް ބޭއްވުމަށް ވަނީ ހަމަޖެހިފައެވެ.
ކިޝިދާ އަށް ޖަޕާނުގެ އާއްމުންގެ ނުރުހުން އަމާޒުވާން ފެށީ 2021 ގައި އޭނާ މަޤާމާ ހަވާލުވުމަށްފަހު، އެލްޑީޕީގެ ޔުނިފިކޭޝަން ޗާޗްއާ އޮތް ގުޅުން ހާމަވުމާ ގުޅިގެންނެވެ. ހަމައެއާއިއެކު، އޭނާގެ މައްޗަށް އެލްޑީޕީގެ ފަންޑު ރެއިޒިންގ އިވެންޓްތަކުގައި ރެކޯޑު ނުކުރެވި ހުރި ސިޔާސީ ޑޮނޭޝަންތަކުގެ ސިއްރު ފަންޑެއް ހުރިކަން ހާމަވުމާ ގުޅިގެންވެސް އާއްމުންގެ ނުރުހުން ވަނީ އޭނާގެ މައްޗަށް އަމާޒުވެފައެވެ.
Advertisement
This content is created and paid for by advertisers and does not involve Voice Journalists
