ރަޝިއާގެ ކުރްސްކް އަށް އެރި ޔޫކްރެއިން ގެ ސިފައިންނަށް އަމާޒުކޮށް ރަޝިއާގެ އަސްކަރިއްޔާއިން ވަރުގަދަ ހަމަލާތަކެއް ދީފިއެވެ.

މިސައިލްތަކާއި، ޑްރޯންތަކާއި އެނޫންވެސް ހަތިޔާރުތަކުން ވައިގެ މަގުން ރަޝިއާ ސިފައިން ރައްދުދީފައިވާއިރު، ޔޫކްރެއިން ގެ ސިފައިން ކުރްސްކް އަށް އަރައި، ދިން ހަމަލާއަކީ ރަޝިއާ އާއި ޔޫކްރެއިން ގެ ހަނގުރާމަ ފެށުމަށްފަހު މިހާތަނަށް ރަޝިއާގެ ސަރަހައްދަކަށް އަމާޒުކޮށް ޔޫކްރެއިން އިން ދިން އެންމެ ވަރުގަދަ އެއް ހަމަލާއެވެ.

ރަޝިއާގެ ރައީސް ވްލަދިމީރް ޕުޓިން ސިފަކުރެއްވި ގޮތުގައި ޔޫކްރެއިންގެ އެތައް ހާސް ސިފައިން ކުރްސްކް އަށް އަމާޒުކޮށް ދިން މި ކުއްލި ހަމަލާއަކީ ރަޝިއާގެ ބާރުތައް މަޑުޖައްސާލުމުގެ މަގުސަދުގައި ދިން ހަމަލާއެކެވެ.

Advertisement

ޔޫކްރެއިން ގެ މި ހަމަލާއާއި އެކު އެ ސަރަހައްދު ދޫކޮށް ގާތްގަނޑަކަށް 200،000 މީހުން ގޮސްފައިވާއިރު، ރަޝިއާގެ ހަނގުރާމައާ ބެހޭ ބްލޮގަރުން ބުނާ ގޮތުގައި ކުރްސްކް ފްރޮންޓުގައި ދެގައުމުގެ ދެމެދުގައި ވަރުގަދަ ކުރިމަތިލުންތަކެއް ދަނީ ހިނގަމުންނެވެ.

ޔޫކްރެއިން އިން ސަރަޙައްދުގެ ކޮންޓްރޯލް އިތުރުކުރަން މަސައްކަތް ކުރަމުންދާއިރު،  ރަޝިއާއިން ސިފައިންނާއި ބަރު ހަތިޔާރުތައް އެތަނަށް ފޮނުވައި، ޔުކްރެއިންގެ ގިނަ ހަމަލާތަކެއް ހުއްޓުވާލައިފައިވާ ކަމަށް ބްލޮގަރުން ވަނީ ހާމަކޮށްފައެވެ.

މި ހަމަލާތަކާއި ގުޅޭ ތަފްސީލުތައް ހާމަކުރުމުގެ ގޮތުން ރަޝިއާގެ ޑިފެންސް މިނިސްޓްރީން ވަނީ އެ ސަރަހައްދުގައި ތިބި ޔޫކްރެއިން ގެ ސިފައިން  ސުޚޯއި ސޫ-34 ބޮމްބަރު މަތިންދާބޯޓުތަކުން ހަމަލާދޭ މަންޒަރުތައް ހާމަކޮށް، ބޯޑަރުން 26-28 ކިލޯމީޓަރު (16-17 މޭލު) ދުރުގައި ހުރި ރަޝިއާގެ އަވަށްތަކަށް ދެމުންގެންދިޔަ ހަމަލާތައް ވެސް ހުއްޓާލެވުނު ކަމަށް ބުނެފައެވެ.

ޔޫކްރެއިން ސިފައިންގެ ޖުމްލަ 35 ޓޭންކާއި، 31 އާމަޑް ޕާސަނަލް ކެރިއަރާއި، 18 އިންފެންޓްރީ ފައިޓިންގ ވެހިކަލްއާއި، އަދި 179 އެހެނިހެން އާމަޑް ވެހިކަލް ހަލާކުކޮށްލާފައިވާ ކަމަށް އެ މިނިސްޓްރީން މައުލޫމާތުދެއެވެ.