ހުޅުމާލެ އަދި މާލޭގައި ހުންނަ ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) އަށް ވަނުމަށް ފޯމު ހުށަހެޅުމަށް ހުޅުވާލައިފިއެވެ.

މިއަހަރު ހުޅުމާލޭގެ އިތުރުން މާލޭގެ ސީއެޗްއެސްއީ ގައި ވެސް ކިޔަވައިދިނުމަށް ސަރުކާރުން ނިންމާފައިވާއިރު، ތައުލީމާއި ބެހޭ ވުޒާރާއިން ކުރި އިއުލާނެއްގައި ބުނީ، 2024 ވަނަ އަހަރުގެ ސެޕްޓެމްބަރު މަހު ފެށުމަށް ހަމަޖެހިފައިވާ މަތީ ސާނަވީ (ކީސްޓޭޖް 5) ކިޔެވުމަށް މި ދެ އިމާރާތުގެ ތެރެއިން އެ ދަރިވަރަކު ބޭނުން މަރުކަޒެއްގައި ކިޔެވޭ ގޮތަށް ދަރިވަރުން ވެއްދުމަށް ފޯމު ހުށައެޅުގެ ފުރުޞަތު މިހާރު ހުޅުވާލާފައިވާ ކަމަށެވެ.

އެ ވުޒާރާއިން ބުނީ ސްކޫލަށް ވެއްދުމަށް ހުށައަޅަން ޖެހޭ  އެޑްމިޝަން ފޯމްގެ ލިންކް އެ ވުޒާރާގެ ވެބްސައިޓުން ލިބެން ހުންނާނެކަމަށެވެ.

އެ ވުޒާރާއިން ހާމަކުރި ގޮތުގައި، ސީއެޗްއެސްއީ އިން މަތީ ސާނަވީއަށް ކިޔެވުމަށް ފުރުސަތު ދިނުމަށް ހަމަޖެހިފައިވާ އުސޫލަކީ:

1) 1 މެއި 2023 ގެ ފަހުން ބައިވެރިވެފައިވާ އެސްއެސްއީ އަދި ޖީސީއީ އޯލެވެލް/ އައިޖީސީއެސްއީ އިމްތިހާނުން ޖުމްލަ 5 މާއްދާއިން ދަށްވެގެން "ސީ" ގްރޭޑް ލިބިފައިވުން (މީގެ ތެރޭގައި ދިވެހި ބަސް ނުވަތަ އިސްލާމިކް ސްޓަޑީޒް އާއެކު ކޮންމެވެސް 1 ސްޓްރީމެއްގެ މަދުވެގެން 2 މާއްދާ އިން ދަށްވެގެން ސީ ގްރޭޑް ލިބިފައިވުން)

2) ކޮމާރސް ސްޓްރީމްގެ މާއްދާތަކަށް ބެލެވޭނީ އެކައުންޓިންގ، ކޮމާރސ،ް ބިޒްނަސް ސްޓަޑީޒ،ް އިކޮނޮމިކްސް، އަދި މެތެމެޓިކްސް އަދި ސައިންސް ސްޓްރީމް ކަމަށް ބެލެވޭނީ ބަޔޮލޮޖީ، ކެމިސްޓްރީ، ފިޒިކްސް އަދި މެތެމެޓިކްސްއެވެ.

3) އާރޓްސް ސްޓްރީމް މާއްދާތަކަށް ބެލެވޭނި ހިސްޓްރީ އާއި ޖޯގްރަފީއެވެ. އާރޓްސް ސްޓްރީމްގައި ފާސްވެފައިވަނީ ހިސްޓްރީ އާއި ޖޯގްރަފީގެ ތެރެއިން 1 މާއްދާއިންނަމަ 2 ވަނަ މާއްދާއެއްގެ ގޮތުގައި އިންގްލިޝް ލޭންގްއޭޖް، އިންގްލިޝް ލިޓްރެޗަރ، އިކޮނޮމިކްސް ނުވަތަ މެތެމެޓިކްސ،ް މިއިން ކޮންމެވެސް 1 މާއްދާއެއް ބެލެވިދާނެއެވެ.

4) ސައިންސް ސްޓްރީމް ހަދާފައިވާ ދަރިވަރަކަށް، އާރޓްސް ނުވަތަ ކޮމާރސް ސްޓްރީމް އޭލެވެލް ހެދުމުގެ ފުރުސަތު އެދަރިވަރަކު ހަދާފައިވާ މާއްދާތަކަށް ބަލާފައި ދެވިދާނެއެވެ. (އިތުރު މަޢުލޫމާތު އެޕްލިކޭޝަން ފޯމާއެކު ދޫކުރާ އިންފޮމޭޝަން ޝީޓްގައި ލިބެން ހުންނާނެއެވެ.)

5) ރީޗެކުގެ ކުރިން ޝަރުޠު ފުރިހަމަނުވާ ނަމަވެސް، ރީޗެކަށްފަހު، ޝަރުޠު ފުރިހަމަވާނެކަމަށް ލަފާކުރެވޭ ކުއްޖެއްނަމަ، އެޕްލިކޭޝަން ފޯމް ހުށައެޅިދާނެއެވެ. މިގޮތަށް ފޯމް ހުށައަޅާ ދަރިވަރުން ރީޗެކް ނަތީޖާ ދޫކުރާ ދުވަހުން ފެށިގެން 2 ދުވަހުގެ ތެރޭގައި އެ ކުއްޖެއްގެ ނަތީޖާ ހުށައަޅަންވާނެއެވެ.

އެ ވުޒާރާއިން ބުނީ، މިހާރު ގްރޭޑް 11 ގައި ކިޔަވަމުންދާ ދަރިވަރުން ފުރިހަމަކުރަންޖެހޭ އެޑްވާންސްސަބްސިޑިއަރީ (އޭއެސް) ލެވެލް އިމްތިހާނުތައް ފުރިހަމަކުރުމަށްފަހު، ގްރޭޑް 12 އަށް ސްކޫލު ބަދަލުކުރުމަށް ބޭނުންވާ ދަރިވަރުންނަށް ސްކޫލުގައި ޖާގަ އޮތް މިންވަރަކުން، ދެ އިމާރާތުންވެސް ފުރުސަތު ދެވޭނެ ކަމަށެވެ.

ހަމައެއާއިއެކު،  ބީޓެކް މާއްދާތައް ކިޔަވަން ބޭނުންވާ ދަރިވަރުންނަށް ހުޅުމާލޭގައި ހުންނަ ސީއެޗްއެސްއީގެ އިމާރާތުން އެ ފުރުސަތު ލިބޭނެ ކަމަށް އެ ވުޒާރާއިން ހާމަކުރެއެވެ.

ދަރިވަރުންނަށް ޖާގަ ހަމަޖެހިފައިވާކަން 21 އޮގަސްޓު 2024 ފެށިގެން އަންގަމުންދާނެ ކަމަށާއި، ޖާގަ ލިބިފައިވާ ސްކޫލުން ދަރިވަރުންގެ އީމެއިލަށް ސްކޫލުގައި ރަޖިސްޓްރީވުމާ ބެހޭ އިރުޝާދު ފޮނުވާނެކަމަށް އެ ވުޒާރާއިން މައުލޫމާތުދެއެވެ.