ރާއްޖެއަށް މިހާރު ކުރަމުންދާ ވިއްސާރައިގައި، ނަޖިސް ބޭރުވުމާއި ފެން ހަރުލާފައި ހުރުމުގެ ސަބަބުން، ބަލިތައް ފެތުރިދާނެތީ އެކަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

ވިއްސާރައާއި ގުޅިގެން ސަމާލުވާންވީ ކަންތައްތައް ބަޔާންކޮށް އެއިދާރާއިން ނެރުނު ނޫސްބަޔާނެއްގައި ބުނީ، ވިއްސާރަވެ ފެންބޮޑޫވުމާއި، ސެޕްޓިކް ޓޭންކް އޮވާފްލޯވެ، ނަޖިސް ބޭރުވުމާއި އަދި ވިއްސާރައިގެ ސަބަބުން ފެން ހަރުލާފައި ހުރުމުން ބައެއް ބަލިތައް ފެތުރުމުގެ ފުރުސަތު ބޮޑުވާ ކަމަށެވެ.

އޭގެ ތެރޭގައި ބޭރަށް ހިންގުމާއި، ބުޅަލާއި މީދަލުގެ ނަޖިހުން ފެތުރޭ އެކިކަހަލަ ބަލިތައް، މަދިރީގެ ޒަރީއާއިން ފެތުރޭ ޑެންގީ ފަދަ ބަލިތައް ފެތުރުމުގެ ފުރުސަތު ކުރިއަށް އޮތް ދުވަސްތަކުގައި ބޮޑުކަން ފާހަގަކުރައްވަމުން އެޗްޕީއޭއިން ވަނީ މި ބަލިތަކުން ސަލާމަތްވުމަށް ފިޔަވަޅު އެޅުމަށް އިލްތިމާސް ކޮށްފައެވެ.

މިގޮތުން:

1) ފެންބޮޑުވެފައިވާ ސަރަހައްދުތަކުގައި ފެންގަނޑަށް ނޭރުން، ހާއްސްކޮށް ކުޑަކުދިން ފެންގަނޑަށް އެރެ ކުޅެ ނުހެދުން

2) ފެންގަނޑަށް އެރެން ޖެހިއްޖެ ނަމަ ވޯޓާ ޕްރޫފް ތަކެތި ބޭނުންކުރުން

3) ހަންގަނޑުގައި ފާރުގަނޑެއް ހުރިނަމަ ފެނަށް ނޭރުން

4) ފެން ހިންދުމާއި ސާފު ކުރުމުގައި ހަރަކާތްތެރިވާ ފަރާތްތަކުން އެޗްޕީއޭގެ އިރުޝާދާއި އެއްގޮތަށް އަމަލުކުރުން

5) ގިނަގިނައިން ސައިބޯނި ލައިގެން އަތްދޮވުން

6) ފެނުން ތަޣައްޔަރުވެފައިވާ ކާބޯތަކެތި ބޭނުން ނުކުރުން

9) ގޯތި ތެރޭގައި އަދި ދަނޑުގައި ފެންބޮޑުވެފައިވާނަމަ، ހައްދާފައިވާ ގަހުގައި އެޅި ކާބޯތަކެތި ބޭނުން ކުރުމުގެ ކުރިން ރަނގަޅަށް ދޮވުން

10) ބުއިމަށާއި، ކެއްކުމަށް އަދި ތަށިދޮވުމަށް ކެއްކި ވާރޭފެން، ސަޕްލައި ފެން ނުވަތަ ފުޅީގައި ބަންދުކުރެވިފައިވާ ފެން ބޭނުންކުރުން. އަދި ސެޕްޓިކް ޓޭންކް އޯވާފްލޯ ވެފައިވާނަމަ، ވަޅުފެން ބޭނުން ކުރުމުގެ ކުރިން ކްލޮރިން ކުރުން ނުވަތަ ރަނގަޅަށް ކައްކައިގެން ފެން ބޭނުން ކުރުން

11) ފެނާއި ކާބޯތަކެތި އަދި ބޭސް ރައްކާތެރިކޮށް ބެހެއްޓުމާއި ފެން ހިމްދުމަށްފަހު ގޭތެރެ ސާފު ކުރުމާއި ބެހޭގޮތުން އެޗްޕީއޭއިން އާއްމުކޯށްފައިވާ އިރުޝާދާއި އެއްގޮތަށް އަމަލުކުރުން

12) ގެއާއި ގޯތިތެރޭގައި އަދި އާއްމު ތަންތަނުގައި ފެން ހަރުލާފައިވާ ތަކެތިން ފެން ހުސްކޮށް، ފެން ހަރުނުލާނޭހެން ބަންޑުން ޖަހައި ނުވަތަ މަތި ޖަހައި ނުވަތަ ސަތަރިއެއް ފަދަ އެއްޗެއް އަޅައި ބަންދުކުރުން. ނުވަތަ ފެން ނޭޅޭނެ ތަނަކަށް ބަދަލުކުރުން. މަތިޖަހާއިރު ނުވަތަ ސަތަރި އަޅާއިރު، ސަތަރީގެ ނުވަތަ މަތިގަނޑުގައި ވެސް ފެން ހަރުނުލާނޭކަން ކަށަވަރު ކުރުން

13) ދިޔަދޮވި ބެދުނަ ނުދީ ސާފުކުރުން

އެޗްޕީއޭއިން ވަނީ މިކަންކަމަށް ސަމާލުވެ އެއްވެސް ބައްޔެއްގެ އަލާމާތެއް ފެނި، ހާލަތު ގޯސްވާނަމަ، ލަސްނުކޮށް ސިއްހީ ލަފާހޯދުމަށް އިލްތިމާސްކޮށްފައެވެ.