އަންނަ މަހު އޮންނަ އިންތިޚާބުގައި ޖަޕާނުގެ ވެރިކަންކުރަމުން އަންނަ ލިބަރަލް ޑިމޮކްރެޓިކް ޕާޓީ (އެލް.ޑީ.ޕީ)ގެ ލީޑަރޝިޕަށް ވާދަނުކުރައްވާނެކަމަށް ޖަޕާނުގެ ބޮޑުވަޒީރު ފުމިއޯ ކިޝީޑާ ވިދާޅުވެއްޖެއެވެ.

މިއަދު ޓޯކިޔޯގައި އޮތް ނޫސްވެރިންގެ ބައްދަލުވުމެއްގައި ކިޝީޑާ ވިދާޅުވީ މިއީ އެލް.ޑީ.ޕީގެ އިސްސަފަށް އައު މޫނެއް އަންނަންވީ ވަގުތުކަމަށާއި، ޕާޓީ ލީޑުކުރައްވަން ވަޑައިގަންނަވާ ބޭފުޅަކަށް ފުރިހަމައަށް އެއްބާރުލުން ދެއްވާނެކަމަށެވެ. އަދި މިވަގުތު މުހިއްމީ އެލް.ޑީ.ޕީއަކީ ބަދަލުވަމުން އަންނަ، ޑިމޮކްރެޓިކް ޕާޓީއެއްކަން ރައްޔިތުންނަށް އެނގުންކަމަށާއި، އެ ބަދަލުތަކުގެ ފެށުން ވާން ޖެހެނީ ލީޑަރޝިޕްގެ ބަދަލުވުމުންކަމަށް ދެކެވަޑައިގަންނަވާކަމަށް އޭނާ ވިދާޅުވިއެވެ.

އެލް.ޑީ.ޕީގެ ލީޑަރަކަށް ކިޝީޑާ އިންތިޚާބުވެވަޑައިގަތީ 2021 ވަނަ އަހަރުގެ ސެޕްޓެމްބަރު މަހުއެވެ. އަދި އޭގެ ދުވަސްކޮޅެއްފަހުން ޖަޕާނުގެ އާއްމު އިންތިޚާބު ކާމިޔާބުކުރެއްވިއެވެ.

Advertisement

އެހެންނަމަވެސް އެލްޑީޕީއަށް މިފަހަކަށް އައިސް ކުރިމަތިވި ހިޔާނާތުގެ ތުހުމަތުތަކުގެ ސަބަބުން ކިޝީޑާގެ މަގުބޫލުކަންވަނީ ވަރަށް ބޮޑަށް ދަށްވެފައެވެ.

ޕާޓީގެ އިވެންޓްތަކަށް ޓިކެޓް ވިއްކައިގެން ލިބުނު ފައިސާތަކަށް ހިޔާނާތްތެރިވިކަމުގެ ތުހުމަތު ގާނޫނު ހަދާމަޖިލީހުގެ ގިނަ މެމްބަރުންތަކަކަށްވަނީ ކުރިމަތިވެފައެވެ.

80 ވަރަކަށް މެމްބަރުންނަށް ތުހުމަތުގެ އިނގިލި ދިއްކުރެވޭއިރު، މީގެ ތެރޭގައި އަވަހާރަކޮށްލާފައިވާ ކުރީގެ ބޮޑުވަޒީރު ޝިންޒޯ އަބޭއަށް ވަފާތެރި ފެކްޝަންގެ މެމްބަރުން ގިނައެވެ.

މީގެ އިތުރުން ޔެންގެ އަގު ވެއްޓި، ތަކެތީގެ އަގުތައް އުފުލުމުގެ ސަބަބުން ރައްޔިތުންގެ ނުރުހުން ކިޝީޑާއަށާއި ސަރުކާރަށް ވަނީ އަމާޒުވެފައެވެ.

ޖަޕާނުގެ ބޮޑުވަޒީރުކަމަށް އާއްމުކޮށް ވަޑައިގަންނަވަނީ ގާނޫނު ހަދާ މަޖިލީހުގެ އެންމެ ގިނަ ގޮނޑި ނަގާ ޕާޓީގެ ލީޑަރެވެ.