ސްރީލަންކާގެ އަނޫރާދަޕޫރާގައި އޮންނަ އެންސީޕީބީއޭ އޯލް އައިލެންޑް އޯޕަން ބެޑްމިންޓަން ޗެންޕިއަންޝިޕްގައި ވާދަކުރާ ރާއްޖޭގެ ބެޑްމިންޓަން އެކަޑަމީ އޮފް ނައިފަރުގެ ޓީމު މުބާރާތުގައި ވާދަކުރުމަށްޓަކައި ލަންކާއަށް ދިއުމަށް މިއަދު ފުރައިފިއެވެ.

ބެޑްމިންޓަން އެކަޑަމީ އޮފް ނައިފަރުގެ މެނޭޖަރު ރަޝްވާން އަހުމަދު ވޮއިސް ސްޕޯޓްސްއަށް މައުލޫމާތު ދިން ގޮތުގައި މިއަދު ލަންކާއަށް ފުރި އެކަޑަމީގެ ޓީމުގައި ހިމެނެނީ 11 ކުޅުންތެރިންނެވެ. އޭގެތެރޭގައި ހިމެނެނީ ހަތް ފިރިހެން ކުޅުންތެރިންނާއި ހަތަރު އަންހެން ކުޅުންތެރިންނެވެ.

އޭގެތެރޭގައި 13 އަހަރާއި 15 އަހަރުންދަށު އަންހެން އަދި ފިރިހެން އުމުރުފުރާގެ އިތުރުން 17 އަހަރުން ދަށުގެ ފިރިހެން ސިންގަލް އަދި ޑަބަލްސް އިވެންޓުގައި ވެސް މިކުޅުންތެރިން ވާދަކުރާނެވެ.

އިތުރަށް ވާހަކަދައްކަމުން ރަޝްވާން ބުނީ މިފަދަ މުބާރާތެއްގައި އެކަޑަމީން ބައިވެރިވުމުގެ އެންމެ ބޮޑު މަގުސަދަކީ ވާދަވެރި މުބާރާތެއްގައި ވާދަކޮށްލުމުގެ ފުރުސަތު މިކުދިންނަށް ހޯދައިދިނުމެވެ. އަދި މިފުރުސަތުގައި އަޅުގަނޑު ފާހަގަކޮށްލަން ބޭނުން އެކަޑަމީގެ ހަރަކާތްތައް ކުރިއަށް ގެންދިއުމުގައި ނައިފަރުގެ ކައުންސިލާއި ކުޅުންތެރިންގެ ބެލެނެވެރިންގެ ފަރާތުން ލިބެމުންދާ އެއްބާރުލުމާއި އެހީތެރިކަން... 

މީގެ އިތުރުން މިދަތުރުގައި ޓީމާއެކު އެކަޑަމީގެ ހެޑްކޯޗް ހުސެއިން ރަޝީދުގެ އިތުރުން އަބްދުލް ރައޫފް ބައިވެރިވިއިރު، މުބާރާތުގެ ކުރިން ލަންކާގެ ތަޖުރިބާކާރު ކޯޗަކާއެކު އިތުރު ތަމްރީނުތަކެއް ހެދުމަށްވެސް ވަނީ ހަމަޖެހިފައެވެ.