ރާއްޖޭގައި ލޭނު މަސްވެރިކަން ކުރާއިރު، ލޭނުގައި ޖެހޭ މިޔަރުތައް އެއްގަމަށް ގެނެސް ޕްރޮސެސްކޮށް އެކްސްޕޯޓް ކުރުމުގެ ހުއްދަ ލިބޭ ގަވާއިދެއް އެކުލަވާލައިފިއެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން އާއްމު ކުރި ރާއްޖޭގައި ލޭނު މަސްވެރިކަމުގެ ހުއްދަ ދިނުމަށް ހާއްސަ ގަވާއިދުގައިވާ ގޮތުން،  ލޭނުގައި ޖެހޭ މިޔަރުތައް މަރުވެފައިވާނަމަ އެއްގަމަށް ގެނެސް އޮންނަ އުސޫލުގެ ތެރެއިން ލައިސަންސް ދޫކުރެވިފައިވާ ބަޔަކަށް ޕްރޮސެސްކޮށް އެކްސްޕޯޓް ކުރުމުގެ ހުއްދަ ލިބިގެން ދާނެ އެވެ.

މިނިސްޓްރީން ބުނީ، މިގޮތަށް ހުއްދަ ދިން ނަމަވެސް މިއީ, ދިވެހިރާއްޖޭގައި މިޔަރު މަސްވެރިކަން ކުރުމަށްހުޅުވާލުން ނޫންކަމަށާއި  ހުޅުވާލުމުގެ ވިސްނުމުގައި ގައި އަޅާ ފިޔަވަޅެއްވެސް ނޫންކަމަށެވެ.

މިގޮތުން ފިޝަރީޒް މިނިސްޓްރީން ބުނީ، ލޭނު މަސްވެރިކަން ކުރުމަށް ލައިސަންސް ކުރެވޭ އުޅަނދުފަހަރުތަކުގައި މިޔަރަށް އަމާޒުކޮށްގެން މަސްވެރިކަން ކުރުމަކީ މިގަވާއިދުގެ ދަށުން މަނާކަމެއް ކަމަށާއި، ލޭނު މަސްވެރިކަމުގައި ހިފޭ މިޔަރު ފަދަ މަސްވެރިކަމުގައި ހިފޭ ބައިކެޗް މަދުކުރުމުގެ ގޮތުން ކޮންމެހެން އަޅަންޖެހޭ ފިޔަވަޅުތައް ހިމެނިފައިވާނެ ކަމަށެވެ.

މިގޮތުން، ބައިކެޗްގެ ގޮތުގައި ހިފޭ މިޔަރު މަދުކުރުމުގެ ގޮތުން، އުޅަނދުގައި ބޭނުންކުރާ ލޭނުކޮޅު  (ބްރާންޗް ލައިން) ގެ މިޔަވާލި (ލީޑަރ) ގެ ގޮތުގައި ވަޔަރު ނުވަތަ ނަރު ( ވަޔަރ ޓްރޭސް) ބޭނުންކޮށްގެން ނުވާނެ ކަމަށާއި، ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުނުވެ އޮންނަ މިޔަރު ވީހާވެސް އަވަހަށް ދޫކޮށްލަންވާނެކަމަށާއި، މިގޮތަށް މިޔަރު ދޫކޮށްލާއިރު މިޔަރަށް ލިބޭ އަނިޔާ ކުޑަކުރުމަށްޓަކައި ބުޅި ނައްޓާ އާލާތް (ޑީ-ހުކަރ) އަދި ލޭނުކޮޅު ބުރި ކުރާ އާލާތް (ލައިންކަޓަރ) ބޭނުންކޮށްގެން މިޔަރުގެ އަނގައާ ނުވަތަ ބުޅިއާ ވީހާވެސް ކައިރިން ނަނު ބުރިކޮށްލަން އިރުޝާދު ދީފައިވާނެ ކަމަށް އެގަވާއިދުގައި ބުނެފައިވެއެވެ.

މީގެ އިތުރުންވެސް، ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުވެފައިވާ މިޔަރު ބަނދަރަށް ގެންނައިރު ހުންނަންވާނީ މިޔަރުގެ އެއްވެސް އުރަހައެއް އޭގެ ހަށިގަނޑުން ވަކިނުކޮށް ކަމަށާއި، މިއީ ދުނިޔޭގެ ފެންވަރުގައި ބަލައިގަނެފައިވާ ލޭނު މަސްވެރިކަމުގެ ބެސްޓް ޕްރެކްޓިސް ކަމަށް ވެސް ގަވާއިދުގައިވެއެވެ.

ލޭނުގައި ޖެހި މަރުވެފައިވާ މިޔަރު އެއްގަމަށް ގެނެސް، މިޔަރު ޕްރޮސެސްކުރުމަށް ޚާއްސަ ލައިސަންސެއް ދޫކުރުމަށް މި ގަވާއިދުގައި ކަނޑައަޅައިފައިވާއިރު, މި ލައިސަންސް ލިބިފައިވާ ފެސިލިޓީއަކަށް މިޔަރު ކިރާ، ޕްރޮސެސްކުރުމަށް މިގަވާއިދުގެ ދަށުން ހުއްދަ ލިބޭނެ ކަމަށް މިނިސްޓްރީން ބުނެއެވެ.

މި ޕްރޮސެސިންސް ފެސިލިޓީތައް ހިންގުމުގައި، ފިޝަރީޒް މިނިސްޓްރީން ލައިސަންސްކުރާ އެހެން މަސް ޕްރޮސެސްކުރާ ފެސިލިޓީތަކެކޭ އެއްފަދައިން ކިރާ މިޔަރުގެމައުލޫމާތު އެ މިނިސްޓްރީން ކަނޑައަޅާ ގޮތެއްގެ މަތީން ފޮނުވާ، މަސް ޕްރޮސެސްކުރުމުގެ ލައިސަންސްގެ ޝަރުތުތަކާ އެއްގޮތަށް އަމަލުކުރަންޖެހޭނެއެވެ.

އެހެންކަމުން، ފިޝަރީޒް މިނިސްޓްރީން ވަނީ "ލޭނު މަސްވެރިކަން ކުރުމުގެ ގަވާއިދު" އަށް އާއްމުންގެ ހިޔާލު ހޯދުމުގެ ފުރުސަތު ހުޅުވާލާފައެވެ. މިގަވާއިދަށް ހިޔާލު ހުށަހެޅުމުގެ ފުރުސަތު އޯގަސްޓް 18 ވަނަ ދުވަހުގެ މެންދުރު 12:00 އަށް ވަނީ ހުޅުވާލެވިފައެވެ.