ހަމައެކަނި ޓެކްސީތަކަށް ޚާއްސަކޮށް ޕާކިން ޒޯނެއް މާލެ އާއި ހުޅުމާލޭގައި ކަނޑައަޅަން ނިންމައިފިއެވެ.
މިކަން ހާމަކޮށްފައިމިވަނީ މިއަދު ބޭއްވި ނޫސްވެރިންގެ ބައްދަލުވުމެއްގައި ޓްރާންސްޕޯޓް މިނިސްޓަރު މުޙައްމަދު އަމީންއެވެ.
މިގޮތުން މިކަމާއި ގުޅޭގޮތުން މިނިސްޓަރު އަމީން ވިދާޅުވީ، ކުރިއަށްއޮތް ދެ ހަފުތާ ތެރޭ މަލެއާއި ހުޅުމާލޭގައި ތަރައްގީކުރާ ޕާކިންޒޯންތައް ކަނޑައަޅަން ފަށާއިރު، އޭގެ ތެރޭގައި ޓެކްސީތަކަށް ހާއްސަ ޒޯންތައް ހިމެނޭނެކަމަށެވެ.
"އެއީ ދާއިމީކޮށް ޓެކްސީ ކުރާ ބޭފުޅުންނަކަށް ވެސް އޮންނަން ޖެހޭ ތަނެއްނޫން. އެކަމަކު މި މަސައްކަތުގައި އުޅުއްވާފައި ޓެކްސީ ޑްރައިވަރުން ބްރޭކެއް ނަގާ ގަޑީގައި އެކަހަލަ ތަންކޮޅެއް ކުޑަ ވަގުތެއްގައި ޕާކު ކުރުމަށްޓަކައި، ހުރިހާ ޓެކްސީ ޑްރައިވަރުންނަށް ބޭނުން ކުރެވޭ ގޮތަށް އެތަން ކަނޑައެޅިގެން ދާނީ"
މިނިސްޓަރު އަމީން ވިދާޅުވިއެވެ.
ހުޅުމާލޭގައި އެކަމަށް ޚާއްސަ ޒޯނަށް ބިމެއް ބަލާފައިވާއިރު، މިކަމަށްޓަކައި މާލެއިން ބިމެއް ބަލަމުން އަންނަ ކަމަށް މިނިސްޓަރު ވިދާޅުވިއެވެ. އަދި މި ޒޯނުތަކުގައި ޕާކު ކުރެވޭނީ ހަމައެކަނި ޓެކްސީ ބޯޑު އޮންނަ ފަރާތްތަކަށް ކަމަށާއި އެތަނަށް ވެސް ގަވާއިދެއް ހަދައި އިއުލާނު ކުރައްވާނެ ކަމަށް ވެސް މިނިސްޓަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
