ރާއްޖެ އައި ނެދަލޭންޑްގެ ރައްޔިތެއްގެ ލަގެޖުން 6 ކިލޯގެ މަސްތުވާތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް އިން ހާމަކޮށްފިއެވެ.

ކަސްޓަމްސް އިން ބުނީ މި މަހުގެ 11 ވަނަ ދުވަހު ރާއްޖެ އައި މީހެއްގެ ލަގެޖުން މަސްތުވާތަކެތީގެ ބާވަތެއް ކަމަށްވާ ކެތިނޯން އަތުލައިގެންފައިވާ ކަމަށާއި، އެތަކެތީގެ ބަރުދަނުގައި 6.070 ކިލޯގްރާމް ހުރި ކަމަށެވެ.

އެތަކެތީގެ މަގުމަތީ އަގު 9,105,000 ރުފިޔާއަށް އަރާކަމަށް ކަސްޓަމްސް އިން ބުނެއެވެ.

ކަސްޓަމްސް އިން އިތުރަށް ބުނީ، މި ތަކެތި ފެނިފައި ވަނީ ގަތަރުގެ ދޯހާއިން ރާއްޖެއައި ނެދަލޭންޑްގެ 30 އަހަރުގެ ފިރިހެން ފަސިންޖަރެއްގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވުމުން ލަގެޖް ބަލާ ފާސްކުރުމުގެ ތެރޭގައި ކަމަށާއި، މި މައްސަލަ އިތުރަށް ތަހުގީގު ކުރުމަށް މައްސަލައިގައި އަތުލައިގަނެވުނު މަސްތުވާތަކެއްޗާއި އެ މީހާ ފުލުހުންނާއި ހަވާލުކޮށްފައިވާކަމަށެވެ.