ސްވީޑަން އިން މަކުނު ވިދުރި ނުވަތަ އެމްޕޮކްސްގެ ނުރައްކާތެރި ވޭރިއެންޓެއް ކަމަށްވާ އެމްޕޮކްސް ކްލޭޑް 1 ގެ ފުރަތަމަ ކޭސް ފެނިއްޖެއެވެ.
ސްވީޑަނުގެ ސަރުކާރުން މި ކަން އިޢުލާނު ކުރީ ބުރާސްފަތި ދުވަހުއެވެ. މިއީ އެފްރިކާގެ ބޭރުގައި މި ވައްތަރުގެ ފުރަތަމަ ކޭސް ފެނުނު ފަހަރެވެ. އަދި ކުރިއަށް އޮތް ދުވަސްތަކުގައި މި ސަރަޙައްދުގައި އިތުރު ކޭސްތައް ފެނިދާނެކަމަށް ބެލެވޭ ކަމަށް އެ ސަރުކާރުން ބުނެފައިވެއެވެ.
"މިހާރު މެންދުރުފަހު ވަގުތެއްގައި ކަށަވަރުވެއްޖެ އެމްޕޮކްސްގެ އިތުރަށް ނުރައްކާތެރި ވައްތަރެއްކަމަށްވާ ކްލޭޑް 1 ގެ އެއް ކޭސް ސްވީޑަނުގައި ފެނިފައިވާކަން،" ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ސްވިޑެންގެ ސިއްޙަތާއި އިޖްތިމާޢީ ކަންކަމާބެހޭ ވަޒީރު ޖަކޮބް ފޯސްމެޑް ވިދާޅުވިއެވެ.
ދުނިޔޭގެ ސިއްޙަތު ޖަމްޢިއްޔާއިން ބުދަ ދުވަހު ވަނީ ދެ އަހަރުގެ ތެރޭގައި ދެވަނަ ފަހަރަށް އެމްޕޮކްސް ބަލި ދުނިޔޭގެ ޢާންމު ސިއްޙަތުގެ ކުއްލި ނުރައްކަލެއްގެ ގޮތުގައި އިޢުލާނުކޮށްފައެވެ. މިއީ ކޮންގޯ ޑިމޮކްރެޓިކް ރިޕަބްލިކްގައި ފެތުރުނު ބައްޔެއް އެހެން ޤައުމުތަކަށް ފެތުރުމާ ގުޅިގެންނެވެ.
މިހާތަނަށް އެމެރިކާ އާއި ކެނެޑާގައި މި ބަލީގެ އެއްވެސް ކޭހެއް ފާހަގަކުރެވިފައެއް ނުވެއެވެ. ސްވީޑަންގެ ޢާންމު ސިއްޙަތާބެހޭ އިދާރާއިން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ އެ ކޭހުގެ އިތުރުންވެސް ކުރިއަށް އޮތް ތަނުގައި އެގައުމަށް އިމްޕޯޓްވާ މަދު ކޭސްތަކެއް ފެންނާނެ ކަމަށް ބެލެވޭ ކަމަށެވެ.
ސްވީޑަންގެ ދައުލަތުގެ އެޕިޑެމިއޮލޮޖިސްޓް މެގްނަސް ގިސްލެން ބުނެފައިވަނީ މި މީހާއަށް ބަލި ޖެހިފައިވަނީ "އެމްޕޮކްސް ކްލޭޑް 1 ބޮޑަށް ފެތުރިފައިވާ އެފްރިކާގެ ސަރަޙައްދަކަށް" ދަތުރެއް ކުރުމުގެ ތެރޭގައި ކަމަށާއި، ސްޓޮކްހޯމްގައި ސިއްޙީ އެހީއަށް އެދުމަށްފަހު އެ މީހާއަށް މިހާރު "ފަރުވާ ލިބިފައިވާ" ކަމަށެވެ.
Advertisement
This content is created and paid for by advertisers and does not involve Voice Journalists
