ކޭ ހެދިކާއެއްގެ ތެރޭގައި އޮތް ފުޅިތޮށިގަނޑެއްގެ ސަބަބުން ކުއްޖެއްގެ ހިރުގަނޑު ކަފައިގެން ހިނގައްޖެއެވެ.

ގދ. ތިނަދޫގައި ހިނގި މިހާދިސާގެ ވާހަކަ ހިއްސާކުރަމުން، މީހަކު ފޭސްބުކްގައި ކުރި ޕޯސްޓެއްގައި ބުނީ، ފުޅިތޮށިކޮޅު އޮތް ހެދިކާ ގަތީ އެރަށުގައި ހެދިކާ ވިއްކާތަނަކުން ކަމަށެވެ. އެއީ އާއްމުކޮށް ހެދިކާ ވިއްކާ ތަނެއްކަމަށް އޭނާ ބުންޏެވެ. މި ހާދިސާގައި ކަފައިގެން ގޮސްފައިވަނީ ތިރީ ހިރުގަނޑެވެ.

މި ޕޯސްޓްގައި އޭނާ ވަނީ ފުޅިތޮށިކޮޅާއި، ކަފައިގެން ގޮސްފައިވާ ތަން ފެންނަ ފޮޓޯތައް ހިއްސާކޮށްފައެވެ.

ފޭސްބުކްގައި ކޮށްފައިވާ ޕޯސްޓް-- 

މި ފިހާރަ އަކީ ތިނަދޫގެ ވަރަށް ގިނަ މީހުން ހެދިކާ ގަންނަ ތަނެއްކަން ފާހަގަކޮށް އޭނާ ވަނީ ހެދިކާ ހަދާ ތަންތަނުގެ ސާފުތާހިރުކަން ކުޑަތަނެއްގެ ގޮތުގައި ސިފަކޮށްފައެވެ.

އެއާއިއެކު، މި ޕޯސްޓަށް ގިނަ އަދަދެއްގެ ބަޔަކު ކޮމެންޓް ކޮށްފައިވާއިރު، އޭގެ ތެރެއިން ބައެއް މީހުން ބުނީ، އެ ފިހާރައިގެ ސާފުތާހިރުކަން ކުޑަކަން މީގެ ކުރިންވެސް ފާހަގަކުރެވިފައިވާ ކަމަށެވެ. މިކަންކަން ބަލާނެ ފަރާތެއް ނުވާކަމަށާއި، ކާތަކެތި ބަހައްޓާ އެ ފިހާރައިގެ ތެރޭގައި މެހިވެސް ގިނަ ކަމަށް މީހުން ވަނީ ބުނެފައެވެ.

މިކަމާއި ގުޅިގެން ގިނަ ބަޔަކު އަންނަނީ އެފަދަ ތަންތަނަށް ފިޔަވަޅު އެޅުމަށް ގޮވާލަމުންނެވެ.

މި މައްސަލާގައި ވޮއިސް އިން ގދ. ތިނަދޫ ޑރ އަބްދުއްސަމަދު މެމޯރިއަލް ހޮސްޕިޓަލްގެ އިސް ފަރާތެއްގެ ބަހެއް ހޯދާލުމަށް ކުރި މަސައްކަތް އަދި ވަނީ މައުލޫމާތު ލިބޭގޮތް ނުވެފައެވެ.