ނިއުޒިލެންޑްގެ ސިޓީއެއްކަމަށްވާ އޯކްލޭންޑުގައި ގެދޮރުނެތް މީހުންނަށް އެހީތެރިވަމުންދާ ޗެރިޓީއަކުން،  އާންމު ފަރުދެއްގެ ފަރާތުން ހަދިޔާކުރި ކެންޑީތަކެއް ހިމެނޭ ކާބޯތަކެތީގެ ޕާރުސަލްތަކެއް ބެހުމުގައި، އެނގުމަކާ ނުލައި މަސްތުވާތަކެތީގެ ނުރައްކާތެރި ބާވަތެއް ކަމަށްވާ  މެތަމްފެޓަމިން އެކުލެވޭ މެޓާ ތަކެއް ބަހައިފިއެވެ.

މިކަމާއި ގުޅިގެން އޯކްލޭންޑް ސިޓީ މިޝަނުން ބުނީ، މި މެޓާތައް ހިމެނިދާނެ ޕާރުސަލްތައް ހޯދުމަށްޓަކައި 400 އާއި ގާތްކުރާ އަދަދެއްގެ މީހުން ހޯދުމަށް އެ ޗެރިޓީގެ މުވައްޒަފުން މަސައްކަތް ފަށާފައިވާކަމަށެވެ.

މިހާތަނަށް މި މެޓާތައް ކެއުމުގެ ސަބަބުން ތިން މީހަކު ހޮސްޕިޓަލުގައި ފަރުވާ ހޯދައިފައިވާއިރު، ފަރުވާއަށް ފަހު އެމީހުން ދޫކޮށްލާފައިވާ ކަމަށް އެ ޗެރިޓީން ބުނެއެވެ.

މަސްތުވާތަކެތި ޗެކްކޮށް، އެކަމާގުޅޭ ސިޔާސަތުތަކާއި ބެހޭ މަސައްކަތްކުރާ ނިއުޒިލޭންޑް ޑްރަގް ފައުންޑޭޝަނުން މި މެޓާތައް ޓެސްޓް ކުރުމަށްފަހު ހާމަކުރިގޮތުގައި، ކެންޑީގައި އެކުލެވިފައިވާ މެތެމްފެޓަމައިންގެ މިންވަރަކީ އާންމުކޮށް މީހަކު ބޭނުންކުރާ މިންވަރަށްވުރެ 300 ގުނަ އިތުރު މިންވަރެކެވެ. އަދި އެއީ ފުރާނަ އަށް ނުރައްކާވެ، މަރުވެދާނެފަދަ މިންވަރެއް ކަމަށް އެ ފައުންޑޭޝަނުން ވަނީ ބުނެފައެވެ. 

މި ފައުންޑޭޝަންގެ ތަރުޖަމާނެއްކަމުގައިވާ ބެން ބާކްސް އަންގ ބުނިގޮތުގައި، މި ފަދައިން އާއްމުތަކެތީގެ ތެރޭގައި މަސްތުވާތަކެތި އެއްކޮށް، އޮޅުވާލުމަކީ ގައުމުތަކުގެ ސަރަހައްދު ހުރަސްކޮށް މަސްތުވާތަކެތި އެތެރެކުރުމަށް ބޭނުންކުރާ އާންމު ގޮތެކެވެ. އަދި މިފަދަ މެޓާ ތައް އެގައުމުގެ އެކި ކަންކޮޅުތަކަށް ބެހިފައި ހުރެދާނެ ކަމުގެ ކަންބޮޑުވުން އޭނާ ފާޅުކުރެއްވިއެވެ.

މެތެމްފެޓަމައިން އެކުލެވޭ ކޮންމެ މެޓައެއްގެ މަގުމަތީ އަގަކީ 1،000 ނިއުޒިލޭންޑް ޑޮލަރު (608 އެމެރިކާ ޑޮލަރު) ކަމަށްވާއިރު، އެ ފުޑް ބޭންކަށް މި މެޓާތައް ހަދިޔާކުރި ފަރާތުން މިކަން ކޮށްފައިވަނީ ގަސްދުގައި ނޫންކަމަށާއި، އެއީ އޮޅުމަކުން ކަމަށް ބެލެވޭކަމަށް ބާކްސް އަންގ ބުންޏެވެ.

މި ތަކެތި ހޯދުމަށް ކުރަމުންދާ މަސައްކަތުގެ ތެރެއިން އެގައުމުގެ ފުލުހުން ވަނީ މިހާތަނަށް އޭގެ 65 މެޓާ ހޯދާފައެވެ.