އިސްލާހީ ދަތުރުގައި އަދާލަތު ޕާޓީއަކީ އެމްޑީޕީގެ އަދި ދިވެހިރައްޔިތުންގެ މުހިންމު ބައިވެރިއެއް ކަމަށް އެމްޑީޕީގެ ޗެއާޕާސަން ފައްޔާޟު އިސްމާޢީލް ވިދާޅުވެއްޖެއެވެ.

ފައްޔާޟު މިހެން ވިދާޅުވެފައިވަނީ އަދާލަތު ޕާޓީގެ 19 ވަނަ އަހަރީ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައެވެ.

އެގޮތުސް ފައްޔާޟުގެ ޕޯސްޓުގައި އޭނާ ވަނީ އަދާލަތު ޕާޓީގެ 19 ވަނަ އަހަރީ ދުވަހުގެ ހެޔޮ އެދުމާއި ތަހުނިޔާ ޕާޓީގެ ރައީސް ޝައިޚް އިމްރާން ޢަބްދުالله އަށާއި، ޕާޓީގެ އިލްމުވެރިންނަށާއި އެންމެހާ މެންބަރުންނަށް އަރިސްކުރައްވާފައެވެ.

"ވޭތުވެދިޔަ މުއްދަތުގައި ޢަދާލަތު ޕާޓީއިން ސާބިތުކޮށްދިނީ ސިޔާސީ ޕާޓީތަކަށް ރާއްޖޭގެ ސިޔާސީ މައިދާނުގައި އޮތް މުހިންމުކަން. ރާއްޖޭގައި މެދުނުކެނޑި ދެމިއޮތް ދެވަނައަށް އެންމެ ދޮށީ ސިޔާސީ ޕާޓީގެ ހައިސިއްޔަތުން އަދާލަތުގެ ތަޖުރިބާ ރާއްޖޭގެ ސިޔާސީ މަސްރަހަށް ނުހަނު މުހިންމު،" ފައްޔާޟު ވިދާޅުވިއެވެ.

ފައްޔާޟު އިތުރަށް ވިދާޅުވީ އިސްލާހީ ދަތުރުގަ އަދާލަތު ޕާޓީއަކީ އެމްޑީޕީގެ އަދި ދިވެހިރައްޔިތުންގެ މުހިންމު ބައިވެރިއެއް ކަމަށެވެ. އެގޮތުން އޭނާ ވިދާޅުވީ ވޭތުވެދިޔަ 10 ވަރަކަށް އަހަރުގެ އޭނާގެ ތަޖުރިބާގައި އަދާލަތު ޕާޓީއަކީ ސިޔާސީ މަސައްކަތުގައި އިތުބާރުކުރެވޭ، ރައްޔިތުންގެ ލާބައާއި މަންފާއަށް ކުރެވުނު މަސައްކަތުގެ އިޚްލާސްތެރި ބައިވެރިއެއްކަމަށެވެ.

ފައްޔާޟު މިހެން ވިދާޅުވެފައިވާއިރު، ޢަދާލަތު ޕާޓީ ފެށިގެން އައިއިރު އެޕާޓީ އަކީ އެމްޑީޕީއާއި ދެކޮޅު ފިކުރެއް ނަމަވެސް، ކުރީގެ ރައީސް މައުމޫން އަބްދުލް ޤައްޔޫމްގެ ވެރިކަން ވައްޓާލުމަށާއި، ކުރީގެ ރައީސް ޔާމީން އަބްދުލްޤައްޔޫމްގެ ވެރިކަން ވައްޓާލުމަށް އެ ޕާޓީން ވަނީ އެމްޑިޕީއާއި ކޯިޝަން ހަދާފައެވެ. އެގޮތުން، ކުރީގެ ރައީސް އިބްރާޙީމް މުހައްމަދު ޞާލިހުގެ ވެރިކަން ނިމެންދެން އެކޯލިޝަން އޮތް އިރު އެމަނިކުފާނަށް ދެވަނަ ދައުރެއް ހޯދައި ދިނުމަށްވެސް އެޕާޓީން ވަރަށް މަސައްކަތް ކުރިއެވެ.