8 ވަނަ އިންޓަރ އޮފީސް/ކޮމްޕެނީ ހޭންޑްބޯޅަ މުބާރާތް 2024 ގެ ފުރަތަމަ ޑިވިޝަނުގައި ވާދަކުރާ ޕޮލިސް ކުލަބު ފިިރިހެން ޓީމުގެ ކުޅުންތެރިންނާއި ޖޯޒީ ހަވާލުކުރުމުގެ ރަސްމިއްޔާތު ހޮނިހިރު ދުވަހު ބާއްވައިފިއެވެ.
ޕޮލިސް ކުލަބުގެ އޮފީހުގައި ބޭއްވުނު މިރަސްމިއްޔާތުގައި ޓީމުގެ ކުޅުންތެރިންނާއި ޖާޒީ ހަވާލުކޮށްދެއްވީ ޕޮލިސް ކުލަބުގެ ރައީސް އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރަޝީދު އެވެ.
މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތުގެ ފިރިހެން ޑިވިޝަނުގައި ހަތަރު ޓީމަކުން ބައިވެރިވެފައިވާއިރު، އޭގެ ތެރޭގައި ހިމެނެނީ ޕޮލިސް ކުލަބުގެ އިތުރުން އެމްޑަބްލިޔުއެސްސީ، ވެމްކޯ އަދި އެމްޕީއެލް އެވެ. އަދި މިޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.
މީގެ އިތުރުން މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތް ފެށުމަށް ކުރިން ތާވަލުކުރެވިފައި އޮތީ މިމަހުގެ 13 ވަނަ ދުވަހަށެވެ. ނަމަވެސް ވިއްސާރަވެ މޫސުން ގޯސްވުމުގެ ސަބަބުން މުބާރާތް ފެށުން ވަނީ މިއަދަށް ފަސްކުރެވިފައެވެ.
ހޭންޑްބޯޅަ މޯލްޑިވްސްގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތު ދިން ގޮތުގައި އެސޯސިއޭޝަނުން މަސައްކަތް ކުރަމުންދަނީ މޫސުން ތަންދޭނަމަ، ކުރީގެ ތާވަލާއި އެއްގޮތަށް މުބާރާތުގެ ކުޅުން މިއަދު ފެށުމަށެވެ.
Advertisement
This content is created and paid for by advertisers and does not involve Voice Journalists
