ރާއްޖެ އަށް ދާދި ފަހުން ކުރި ވިއްސާރަގައި ގެދޮރަށް ގެއްލުންވެ، ވަގުތީ ހިޔާތަކަށް ބަދަލު ކުރި މީހުންގެ ތެރެއިން މިވަގުތު ތިބީ 2 ޢާއިލާއެއްކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

ވިއްސާރައިގައި ޖުމްލަ 5 ގޭބިސީއަކުން ވަގުތީ ހިޔާތަކަށް މީހުން ބަދަލުކޮށްފައިވާއިރު، މިކަމާއި ގުޅޭގޮތުން ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ، ދިރިނޫޅެވޭ ވަރަށް ގެއްލުންވި 5 ގޭބިސީއަކަށް ވަގުތީ އެހީތެރިކަން ފޯރުކޮށްދީފައިވާކަމަށާއި، ބައެއް ފަރާތްތައް މިހާރުވެސް ވަގުތީ ބޯހިޔަވަހިކަމުގައި ތިބި ކަމަށެވެ.

މިގޮތުން 2 ގޭބީސީއެއްގެ 10 މީހަކު މިހާރުވެސް ވަގުތީ ހިޔާތަކުގައި ތިބިކަން ފާހަގަކުރައްވަމުން ހިސާން ވިދާޅުވީ، އާއްމު ހާލަތަކަށް އައުމުން އެފަރާތްތައް އާއްމު ދިރިއުޅުމަށް ރުޖޫއަ ކުރެވޭނެ ކަމަށެވެ.

 އެންޑީއެމްއޭއިން ޖުމްލަ 23 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާއިރު، އޭގެތެރޭގައި މާފަންނުގެ 2 ގެއަކުން 11 މީހުންނާއި ގަލޮޅުގެ ގެއެއްގެ 3 އެޕަރޓްމަންއަކުން 12 މީހެއް ހިމެނެއެވެ.

ވިއްސާރައާ ގުޅިގެން މާލެއިން އެކަނިވެސް 251 ރިޕޯޓް ލިބިފައިވާއިރު، ފެން ބޮޑުވެގެން އެންމެ ބޮޑަށް ގެއްލުން ލިބިފައިވަނީ މާފަންނުގެ ގެތަކަށެވެ. ވިއްސާރައިގައި އެކި ވަރުގެ ގެއްލުންވެގެން މާފަންނުގެ 130 އަށްވުރެ ގިނަ ގެއިން ރިޕޯޓްކޮށްފައިވާކަމަށް އެންޑީއެމްއޭއިން ވަނީ ހާމަކޮށްފައެވެ.