ޓެކްސް ދެއްކުމުގައި މަކަރު ހަދާކަމަށް ތުހުމަތު ކުރެވުމާއި ގުޅިގެން، ޓެކްސް އަށް މަކަރު ހެދުމުގެ ދައުވާ މައި ކެމިސްޓްގެ ވެރިޔާ ހުސެއިން އިރުފާނުގެ މައްޗަށް ކޮށްދިނުމަށް އެދި މޯލްޑިވްސް އިންލޭންޑް ރެވެންނިއު އޮތޯރިޓީ(މީރާ) އިން ޕްރޮސިކިއުޓާ ޖެނެރަލް (ޕީޖީ) އޮފީހަށް ހުށަހަޅައިފި އެވެ.
މިކަމާއި ގުޅިގެން މީރާއިން ނެރުނު ނޫސްބަޔާނުގައި ބުނީ، އިރުފާން، ގަސްތުގައި ޓެކުހަށް މަކަރުހެދިކަމަށް ތުހުމަތުކުރެވޭ ކަމަށާއި މިކަން ޖިނާއީ މައްސަލައެއްގެ ގޮތުގައި މީރާއިން ތަހުގީގުކޮށްފައިވާ ކަމަށެވެ.
އެގޮތުން، 2018 އަދި 2019 އަށް އިރުފާން ހުށަހަޅާފައިވާ ބީޕީޓީ ބަޔާންތަކާއި 2020 އަށް ހުށަހަޅާފައިވާ އިންކަމް ޓެކްސް ބަޔާނުގައި ދޮގު މައުލޫމާތު ހިމަނާފައިވާ ކަމަށް ތުހުމަތު ކުރެވޭ ކަމަށާއި އެކަން ކޮށްފައިވަނީ ޓެކްސް ދެއްކުމުން ގަސްދުގައި އެއްކިބާވުމުގެ ނިޔަތުގައި ކަމަށް މީރާއިން ވަނީ ބުނެފައެވެ.
ހަމައެއާއިއެކު، މައި ކެމިސްޓް ގޯޑައުން އާ ގުޅޭ އާމްދަނީ އެއްވެސް ވަރަކަށް 2018-2020 އަށް ހުށަހަޅާފައިވާ ޓެކްސް ބަޔާންތަކުގައި ހިމަނާފައި ނުވާ ކަން ތަހުގީގަށް ހާމަވެފައިވާ ކަން ފާހަގަކުރަމުން މީރާއިން ބުނީ، ޖުމްލަކޮށް އަހަރަކު 53 މިލިއަން ރުފިޔާގެ އާމްދަނީ އެއިދާރާއަށް ރިޕޯޓް ކޮށްފައި ނުވާކަމަށެވެ.
މީރާގެ ބަޔާނުގައި އިތުރަށް ބުނީ، މައި ކެމިސްޓުން މީރާއަށް ޖުމްލަ 12 މިލިއަނަށް ވުރެ ގިނަ ރުފިޔާ، އިތުރަށް ޓެކްސްގެ ގޮތުގައި ދައްކަން ޖެހޭ ކަން އޮޑިޓުން ހާމަވެފައިވާ ކަމަށާއި އަދި އެ ފައިސާ ދައްކަން މީރާއިން އިރުފާނަށް އަންގާފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
