ރ.މިދޫގައި މިހާރު ކުރިއަށްދާ "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގައި އާދިއްތަ ދުވަހުގެ ރޭ ކުޅުނު ތިންވަނަ ހޮވާ މެޗުގައި ފަސޭހަކަމާއެކު ސިދާ ތިން ސެޓުން އާރަށް ބަލިކޮށް ކުޑަފުށިން މުބާރާތުގެ ތިންވަނަ ހޯދައިފިއެވެ.

މުބާރާތުގެ ސެމީފައިނަލް ފުރަތަމަ މެޗުފައި އެންމެ ފަހުގެ ޗެންޕިއަން ޖޯލި ބީންގ އަތުން ސީދާ ތިން ސެޓުން އާރަށްބަލިވިއިރު، ސެމީފައިނަލް ދެވަނަ މެޗުގައި ޖޯލި މޯލްޑިވްސް އަތުން އެންމެ ފަހުގެ ރަނަރަޕް ކުޑަފުށި ބަލިވީވެސް ސީދާ ތިން ސެޓުންނެވެ.

މުޅި މެޗުގައި ވެސް ކުޑަފުށިގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މިމެޗުގެ ފުރަތަމަ ސެޓް ނުވަ ޕޮއިންޓްގެ ލީޑަކާއެކު 16-25 ގެ ނަތީޖާއަކުން ކުޑަފުށިން ކާމިޔާބުކުރިއިރު، ދެވަނަ ސެޓުގައި އެޓީމުން ވަނީ ފަރަގު އިތުރަށް ފުޅާކޮށްފައެވެ. އެގޮތުން މިސެޓް އެޓީމުން ކާމިޔާބުކުރީ 13 ޕޮއިންޓްގެ ފަރަގަކާއެކު 12-25 ގެ ތަފާތުބޮޑު ނަތީޖާއަކުންނެވެ.

ނަމަވެސް މެޗުގެ ތިންވަނަ ސެޓުގައި އާރަށުން ވަނީ އެޓީމުގެ ކުޅުން ރަނގަޅުކޮށް ނަތީޖާގެ ފަރަގު ކުޑަކޮށްފައެވެ. އަދި މިސެޓް ހަތް ޕޮއިންޓްގެ ލީޑަކާއެކު 18-25 ގެ ނަތީޖާއަކުން ކުޑަފުށިން ކާމިޔާބުކުރިއިރު، މިމެޗުގެ މޮޅު ކުޅުބްތެރިއަކަށް ހޮވުނީ ކުޑަފުށީގެ ރޯޝަން އުދަޔަންގާ އެވެ.

މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށްދަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމު ސެމީ ފައިނަލަށް ހޮވުނުއިރު، މުބާރާތުގެ ފައިނަލުގައި މިމަހުގެ 21 ވަނަ ދުވަހުގެ ރޭ 21:00 ގައި ޖޯލި މޯލްޑިވްސް ނުކުންނާނީ އެންމެ ފަހުގެ ޗެންޕިއަން ޖޯލި ބީންގ އާއި ދެކޮޅަށެވެ.

މީގެ އިތުރުން މިމުބާރާތުގެ ޓައިޓަލް ސްޕޮންސަރ އަކަށް މައިލޯ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ