ޕާކިސްތާނުގެ ކުރީގެ ބޮޑުވަޒީރު އިމްރާން ޚާން، މިހާރު ޖަލުގައި ހުންނެވި ނަމަވެސް، އިނގިރޭސިވިލާތުގެ މަޝްހޫރު އޮކްސްފޯޑް ޔުނިވަރސިޓީގެ ޗާންސެލަރ މަޤާމަށް ކުރިމަތިލައްވައިފިއެވެ. މިކަން ހާމަކޮށްފައިވަނީ އޭނާގެ ސިޔާސީ ޕާޓީ، ޕާކިސްތާން ތަހްރީކް-އޭ-އިންސާފް (ޕީޓީއައި) އިންނެވެ.

އޮކްސްފޯޑް ޔުނިވަރސިޓީގެ ކުރީގެ ދަރިވަރެއް ކަމަށްވާ އިމްރާން ޚާންގެ ފަރާތުން މި މަޤާމަށް އެދި ހުށަހެޅުއްވީ ޕީޓީއައިގެ ލަންޑަނުގެ ތަރުޖަމާނު ސައްޔިދު ޒުލްފިކާރު ބުޚާރީ މެދުވެރިކޮށެވެ. މިކަން ޕާޓީން ވަނީ އެކްސް (ކުރީގެ ޓްވިޓަރ) ގައި ކުރި ޕޯސްޓެއްގައި ހާމަކޮށްފައެވެ.

ޕީޓީއައި އިން ބުނެފައިވާ ގޮތުގައި، އަހަރަކަށްވުރެ ގިނަ ދުވަހު ޤާނޫނާ ޚިލާފަށް ހައްޔަރުކުރެވިފައި ހުރި ނަމަވެސް، އިމްރާން ޚާން އަދިވެސް އޭނާގެ އަސާސީ އުސޫލުތަކުގައި ދެމިހުންނެވިކަން މި ހުށަހެޅުމުން ހާމަވެގެންދެއެވެ.

އޭއެފްޕީއަށް ވިދާޅުވި ގޮތުގައި، އިމްރާން ޚާންގެ އިރުޝާދުގެ ދަށުން އޭނާގެ ނަމުގައި މި މަޤާމަށް އެދި ހުށަހަޅާފައިވަނީ. "މިއީ ރަމްޒީ މަޤާމެއް ނަމަވެސް، ވަރަށް ޤަދަރުވެރި އަދި މުހިންމު މަޤާމެއް. އިމްރާން ޚާނަކީ އޮކްސްފޯޑުން ނުކުތް އެންމެ މަޝްހޫރު ދަރިވަރުންގެ ތެރެއިން އެކަކު ކަމުން، އޭނާ ޗާންސެލަރަކަށް ވުން އެއީ ވަރަށް އެކަށީގެންވާ ކަމެއް،" ބުޚާރީ ވިދާޅުވިއެވެ.

އިމްރާން ޚާން މި މަޤާމަށް ހޮވިއްޖެނަމަ، އޭޝިއާ މީހެއްގެ ގޮތުގައި މި މަޤާމަށް ހޮވޭ ފުރަތަމަ ފަރާތްކަމުގައި ވެގެންދާނެ ކަމަށް ބުޚާރީ ފާހަގަކުރެއްވިއެވެ. އެހެންކަމުން މިއީ މުޅި އޭޝިއާއަށާއި ދުނިޔެއަށްވެސް ލިބޭނެ ކާމިޔާބީއެއްކަމުގައި އޭނާ ދެކެވަޑައިގަންނަވައެވެ.

ޔުނިވަރސިޓީގެ ވެބްސައިޓުގައިވާ ގޮތުން، 10 އަހަރުގެ މުއްދަތަށް އޮންނަ މި މަޤާމަށް ކުރިމަތިލާ ފަރާތްތަކުގެ ލިސްޓު އޮކްޓޯބަރު މަހު އާންމުކޮށް، އެ މަހުގެ ފަހުކޮޅު ވޯޓުލުން އޮންނާނެއެވެ.

އިމްރާން ޚާންގެ ކެރިއަރުގައި ޕާކިސްތާނުގެ އެންމެ ފާހަގަކޮށްލެވޭ ކްރިކެޓް ކުޅުންތެރިއެއްގެ ގޮތުގައި ހިމެނިވަޑައިގަންނަވައެވެ. އަދި 2018 އިން 2022 އަށް ޕާކިސްތާނުގެ ބޮޑުވަޒީރުކަން ކުރައްވާފައިވެއެވެ. އެހެންނަމަވެސް، މިހާރު އޭނާ ވަނީ އެކި ބާވަތުގެ ދަޢުވާތަކާ ގުޅިގެން ޖަލުގައި އެއް އަހަރު ފުރިހަމަކުރައްވާފައެވެ.