ސަޢޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތުން ސިޓީފުޅެއް އަރުވައިފިއެވެ.

އެގައުމުގެ ފޮރިން މިނިސްޓްރީގައި ބޭއްވި ބައްދަލުވުމެއްގައި، ރައީސް ޑރ.މުޢިއްޒުގެ ފަރާތުން މި ސިޓީފުޅު ރައްދުކޮށްދެއްވީ ޚާރިޖީ ވަޒީރު މޫސާ ޒަމީރެވެ. އަދި މުޙައްމަދު ބިން ސަލްމާންގެ ފަރާތްޕުޅުން ސިޓީފުޅާއި ހަވާލުވެވަޑައިގަތީ ސަޢުދީ އަރަބިއްޔާގެ ޚާރިޖީ ވަޒީރު އަމީރު ފައިސަލް ބިން ފަރުހާންއެވެ.

މި ސިޓީފުޅުގައި ދެ ޤައުމުގެ ގުޅުމާއި އެކި ދާއިރާތަކުން އެ ގުޅުން އިތުރަށް ހަރުދަނާކުރުމުގެ ވާހަކަ ހިމެނިފައިވެއެވެ.

Advertisement

މިބައްދަލުވުމާއި ގުޅޭ ގޮތުން ޚާރިޖީ ވުޒާރާއިން ބުނީ، ދެ ގައުމުގެ ދެމެދުގައި މިހާރު އޮތް ގުޅުން މިހާރަށްވުރެ ބަދަހިކުރުމަށް މަޝްވަރާކުރައްވާފައިވާކަމަށާއި، ބައްދަލުވުމުގެ ތެރެއިން މިނިސްޓަރު ޒަމީރު ސައުދީ އަރަބިއްޔާއިން ދިވެހިރާއްޖެއަށް ދެމުންގެންދާ އެހީތެރިކަމަށް ޝުކުރު އަދާކުރައްވާފައިވާ ކަމަށެވެ.