ފަސް ރަށެއްގައި އައިސް ޕްލާންޓް ގާއިމުކޮށްދޭނެ ފަރާތެއް ހޯދަން މިނިސްޓްރީ އޮފް ފިނޭންސް އިން އިއުލާނުކޮށްފިއެވެ.

އެ މިނިސްޓްރީން ކުރި އިއުލާނުގައިވާ ގޮތުން އައިސް ޕްލާންޓް ގާއިމުކުރުމަށް ނިންމާފައިވާ 5 ރަށަކީ: 

1) ހދ. ދިއްދޫ

Advertisement

2) އއ. ރަސްދޫ

3) ގދ. ރަތަފަންދޫ

4) ހއ. އިހަވަންދޫ

5) ށ. ކޮމަންޑޫ

ދިވެހި ސަރުކާރުން ސައުދީ ފަންޑް ފޯ ޑިވެލޮޕްމަންޓް ގެ އެހީގެ ދަށުން މި ފަސް ރަށުގައި ގާއިމު ކުރަނީ 30 ޓަނުގެ އައިސް ޕްލާންޓް ކަމަށް ވެސް އިއުލާނުގައިވެއެވެ.

މިނިސްޓްރީން ބުނީ، މި އައިސް ޕްލާންޓް ގާއިމް ކުރުމަށް ޝައުގުވެރިވާ ފަރާތްތައް ހޯދަނީ އިންޓަނޭޝަނަލް ބިޑިން އުސޫލުން ކަމަށާއި މިމަސައްކަތަށް ބީލަން ހުށަހަޅާ ފަރާތްތަކުގެ އަތުން އަނބުރާ ނުލިބޭ ގޮތަށް 1،500 ރުފިޔާ ނުވަތަ 100 ޔޫ.އެސް. ޑޮލަރުގެ ރަޖިސްޓްރޭޝަން ފީއެއް ނަގާއިރު ބިޑް ސެކިއުރިޓީގެ ގޮތުގައި 250،000 ރުފިޔާ ހުށަހަޅަންޖެހޭނެ ކަމަށެވެ.

ބީލަން ހުށަހެޅުމުގެ ފުރުސަތު ހުޅުވާލާފައިވަނީ ސެޕްޓެމްބަރު މަހުގެ 20 ވަނަ ދުވަހުގެ ނިޔަލަށެވެ.