ގައްދޫގައި ބޭސް ބޭނުންކޮށްގެން ބުޅާ މަރަމުންދާ މައްސަލައެއް ފެންމަތިވެފައިވާ ކަމަށް އެ ރަށު ކައުންސިލުން މިއަދު ހާމަކޮށްފިއެވެ.

ކައުންސިލުން މަޢުލޫމާތު ދިންގޮތުގައި، ފާއިތުވި ހަފުތާގެ ތެރޭގައި ރަށުގެ ބޭރު މަގުތަކުންނާއި އެކި ސަރަޙައްދުތަކުން މަރުވެފައިވާ ބުޅަލާއި ކާޅު ފެނިފައިވެއެވެ. މިކަމުގެ ސަބަބުން ޢާންމު ރައްޔިތުންނަށް ދަތިތަކާ ކުރިމަތިވަމުންދާކަމަށް ބުނެ ގިނަ ޝަކުވާތަކެއް ކައުންސިލަށް ލިބެމުންދާކަމަށްވެސް އެފަރާތުން ފާހަގަކޮށްފައިވެއެވެ.

މިހާރު ދަނީ ވިއްސާރަ މޫސުމަކަށް ވެފައި، މި މައްސަލައިގެ ސަބަބުން ބަލިމަޑުކަމެއް ފެތުރިދާނެކަމުގެ ބިރު އޮތްކަމަށް ކައުންސިލުން ވަނީ ފާހަގަކޮށްފައެވެ. އެހެންކަމުން، ބޭސް ބޭނުންކޮށްގެން ބުޅާ މެރުމަކީ ކައުންސިލުން ވަރަށް ބޮޑަށް ނުރުހޭ ކަމެއްކަން އެފަރާތުން ވަނީ ހާމަކޮށްފައެވެ.

Advertisement

"ވީމާ، އާންމު ފަރުދުންގެ ހައިސިއްޔަތުން މިފަދަ ޢަމަލުތައް ހިންގުމުން ދުރުހެލިވުމަށް އަޅުގަނޑުމެން އިލްތިމާސްކުރަން،" ކައުންސިލުން ނެރުނު އިޢުލާނުގައި ބަޔާންކޮށްފައިވެއެވެ.