އެމްޓީސީސީގެ އެންމެ އިސް މަޤާމަށް ބަދަލު ގެނެސް، ކުރީގެ ޑެޕިއުޓީ ކޮމިޝަނަރު އަޙްމަދު ސައުދީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރުގެ މަޤާމަށް މިއަދު އައްޔަންކޮށްފިއެވެ. މި ބަދަލާ ގުޅިގެން، މިހާތަނަށް އެ މަޤާމުގައި ހުންނެވި އަބްދުﷲ ޒިޔާދު އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރުގެ މަޤާމަށް ބަދަލުކުރެވިފައިވެއެވެ.
ކުރީގެ ސަރުކާރުތަކުގައިވެސް އިސް މަޤާމުތަކެއް ފުރުއްވާފައިވާ ޒިޔާދު، އެމްޓީސީސީގެ ސީއީއޯ އަދި އެމްޑީގެ މަޤާމަށް އައްޔަންކުރެވިފައިވަނީ މިދިޔަ އަހަރުގެ ނޮވެމްބަރު 28 ގައެވެ. އޭނާ ކުރިންވެސް އެންވަޔަރަންމަންޓް މިނިސްޓްރީގައި މަސައްކަތްކުރައްވާފައިވެއެވެ.
އެމްޓީސީސީގެ އާ ސީއީއޯ އަދި މެނޭޖިންގ ޑިރެކްޓަރުގެ މަޤާމަށް އައްޔަންކުރެވުނު ސައުދީ އެންމެ ފަހުން މަސައްކަތްކުރެއްވީ މާލޭ ސިޓީ ކައުންސިލްގައެވެ. އޭނާ އެންމެ ފަހުން ފުރުއްވި މަޤާމަކީ މިހާރުގެ ރައީސް ޑރ. މުޙައްމަދު މުޢިއްޒު މޭޔަރުގެ މަޤާމު ފުރުއްވި ދުވަސްވަރު އުފެއްދި "ކޮމިޔުނިޓީ އެންގޭޖްމަންޓް ޔުނިޓް" ގެ އެންމެ އިސްވެރިޔާގެ މަޤާމެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ސައުދީ ވަނީ ޑެޕިއުޓީ ކޮމިޝަނަރު އޮފް ޕޮލިސްގެ މަޤާމު ފުރުއްވާފައެވެ. 2018 ވަނަ އަހަރު ފުލުހުންގެ އިދާރާ ހިންގުންވެސް އޭނާއާ ހަވާލުކުރެވުނެވެ. އޭގެ ފަހުން އޭނާ ވަނީ ޔޫތު މިނިސްޓްރީގެ ޑެޕިއުޓީ މިނިސްޓަރުގެ މަޤާމަށްވެސް އައްޔަންކުރެވިފައެވެ.
Advertisement
This content is created and paid for by advertisers and does not involve Voice Journalists
