ރ.މިދޫގައި ކުރިއަށް ދިޔަ "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގެ ފައިނަލުގައި ބުދަ ދުވަހުގެ ރޭ ޖޯލި މޯލްޑިވްސްޱއާއި ޖޯލި ބީންގ ވާދަކުރި މެޗު ފަހަތުން އަރައި ތިން ސެޓް އެއް ސެޓުން މޮޅުވެ ޖޯލި ބީންގ ދަށި ދިފާއުކޮށްފިއެވެ.

އެންމެ ފަހުގެ ޗެންޕިއަން ޖޯލި ބީންގ މުބާރާތުގެ ފައިނަލުން ޖާގަހޯދީ ސެމީފައިނަލް ފުރަތަމަ މެޗުގައި ފަސޭހަކަމާއެކު ސީދާ ތިން ސެޓުން އާރަށް ބަލިކުރުމަށްފަހު އެވެ. އަދި ޖޯލި މޯލްޑިވްސް ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި އެންމެފަހުގެ ރަނަރަޕް ކުޑަފުށި ސީދާ ތިން ސެޓުން ބަލިކުރުމަށްފަހުއެވެ. 

މެޗުގެ ފުރަތަމަ ސެޓުގައި ޖޯލި ބީންގ ފަރާތުން އާދައިގެ ކުޅުމެއް ފެނިގެންދިޔައިރު، މިސެޓް އަށް ޕޮއިންޓްގެ ލީޑަކާއެކު 17-25 ގެ ނަތީޖާއަކުން ކާމިޔާބުކުރީ ޖޯލި މޯލްޑިވްސް އެވެ.

ނަމަވެސް ޖެހިގެން އައި ދެވަނަ ސެޓުގައި ޖޯލި ބީންގ ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ތިން ޕޮއިންޓްގެ ލީޑަކާއެކު އެޓީމުން ސެޓް ކާމިޔާބުކުރީ 22-25 ގެ ނަތީޖައަކުންނެވެ.

މެޗުގެ ތިންވަނަ ސެޓުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، 23-25 ގެ ނަތީޖާއަކުން ކާމިޔާބުކުރީ ޖޯލި ބީންގ އެވެ. އަދި ޖެހިގެންއައި ހަތަރުވަނަ ސެޓުގައި ޖޯލި ބީންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މިސެޓް އެޓީމުން ކާމިޔާބުކުރީ ފަސޭހަކަމާއެކު 12-25 ގެ ތަފާތުބޮޑު ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޖޯލި ބީންގ ޝެހާން އެވެ.

މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. 

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމު ސެމީ ފައިނަލަށް ހޮވުނުއިރު، މުބާރާތުގެ ތިންވަނަ ހޯދީ ކުޑަފުއްޓެވެ.

މީގެ އިތުރުން މިމުބާރާތުގެ ޓައިޓަލް ސްޕޮންސަރ އަކަށް މައިލޯ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.