ބަންގްލަދޭޝްގެ ވަގުތީ ސަރުކާރުން އެގައުމުގެ ޑިޕްލޮމެޓިކް (ރަތް) ޕާސްޕޯޓްތައް ބާތިލްކުރަން ނިންމައިފިއެވެ.
މީގެ ތެރޭގައި، އެގައުމުގެ ކުރީގެ ވަޒީރުންނާއި ރައްޔިތުންގެ މަޖިލީހުގެ މެންބަރުންނަށް ދޫކުރެވިފައިވާ ޕާސްޕޯޓުތައްވެސް ހިމެނޭއިރު، މިކަމާ ގުޅޭގޮތުން އަޅަންޖެހޭ ފިޔަވަޅުތައް އެޅުމުގެ މަސައްކަތް ފަށާފައިވާ ކަމަށް ބަންގްލަދޭޝްގެ ހޯމް މިނިސްޓްރީގެ ސެކިއުރިޓީ ސަރވިސް ޑިވިޜަންގެ ސީނިއަރ ސެކްރެޓަރީ މުޙައްމަދު މަޝިއުރު ރަޙްމާން ވިދާޅުވިއެވެ.
ސެކްރެޓަރީ ވިދާޅުވީ، ބަންގްލަދޭޝްގެ އިމިގްރޭޝަން އެންޑް ޕާސްޕޯޓް ޑިޕާޓްމަންޓަށް (ޑީއައިޕީ) މިކަމާ ގުޅޭ އިރުޝާދު ދީފައިވާ ކަމަށާއި، އެ އިދާރާއިން އޭގެ މަސައްކަތްތައް މިހާރު ފަށައި، ވަރަށް އަވަހަށް މިކަމާއި ގުޅޭ އަމުރު ނެރެވޭނެ ކަމަށެވެ.
އެގައުމުގެ ރައްޔިތުންގެ މަޖިލީހުގެ މެންބަރުންގެ އިތުރުން އެބޭފުޅުންގެ އާއިލާ މެންބަރުންވެސް ޑިޕްލޮމެޓިކް ޕާސްޕޯޓް ގެންގުޅޭއިރު، އެކަމާއި ގުޅޭގޮތުން ސެކްރެޓަރީ ވިދާޅުވީ، މަޖިލިސް މެމްބަރުންގެ ޑިޕްލޮމެޓިކް ޕާސްޕޯޓު ކެންސަލްކުރާއިރު، އޮޓޮމެޓިކުން އެމީހުންގެ ޢާއިލާގެ މެންބަރުންގެ ޕާސްޕޯޓުތައްވެސް ކެންސަލްވާނެކަމަށެވެ.
ޑިޕްލޮމެޓިކް ޕާސްޕޯޓު ލިބިފައިވާ މީހަކު އައު ޕާސްޕޯޓެއް ހޯދަން ބޭނުންވާނަމަ، އެމީހަކު ޑިޕްލޮމެޓިކް ނުވަތަ ރަތް ޕާސްޕޯޓު ދޫކޮށްލުމަށްފަހު ޤާނޫނާ އެއްގޮތަށް އާންމު ޕާސްޕޯޓެއް ދޫކުރެވޭނެކަމަށް ވެސް އޭނާ ވިދާޅުވިއެވެ.
ބަންގްލަދޭޝްގެ މަޖިލިސް މެމްބަރުންގެ އިތުރުން، ބޭރު ޤައުމުތަކުގައި ހުންނަ ބަންގްލަދޭޝް މިޝަންތަކުގެ އޮފިޝަލުންނަށްވެސް ރަތް ޕާސްޕޯޓު ލިބެއެވެ. ރަތް ޕާސްޕޯޓު އޮންނަ މީހުންނަށް ބޭރަށް ދަތުރުކުރުމަށް ވިސާ ބޭނުމެއް ނުވެއެވެ. އެމީހުން ކަނޑައެޅިފައިވާ ޤައުމަށް ފޭބުމުން ވިސާ ލިބެއެވެ.
މިނިސްޓްރީގެ ފަރާތްތަކުން ބުނާގޮތުގައި ރަތް ޕާސްޕޯޓު ކެންސަލްކުރުމުން، ކުށުގެ މައްސަލަތައް އޮތް ނުވަތަ ހައްޔަރުކުރެވިފައިވާ ކުރީގެ މިނިސްޓަރުންނާއި އެމްޕީންނަށް އާންމު ޕާސްޕޯޓެއް ހޯދުމަށްޓަކައި ޤާނޫނީ މަރުޙަލާއެއް ކަޑައްތުކުރަންޖެހިދާނެއެވެ. އެފަދަ ޙާލަތެއްގައި، ކޯޓު އަމުރެއް ލިބުމަށްފަހު އާންމު ޕާސްޕޯޓަކަށް އެދެވޭނެއެވެ.
ޕާސްޕޯޓް ކެންސަލްކުރުމުގެ އަމުރު ނެރުމުން، މިހާރު ބޭރު ގައުމުތަކުގައި ތިބި ކުރީގެ މަޖިލިސް މެމްބަރުން ނުވަތަ މިނިސްޓަރުން އެޤައުމުތަކުގައި ހުރި ޑީއައިޕީ އޮފީހަށް ނުވަތަ ބަންގްލަދޭޝަށް އެނބުރި އައުމަށްފަހު އެމީހުންގެ ރަތް ޕާސްޕޯޓު ދޫކޮށްލަންޖެހޭނެއެވެ.
ބަންގްލަދޭޝްގެ ވަގުތީ ސަރުކާރުން މިފަދައިން ނިންމާފައިވާއިރު، އެގައުމުގައި އެންމެ ފަހުން ބޮޑުވަޒީރުކަން ކުރެއްވި ޝައިޚް ހަސީނާގެ އަތްޕުޅުގައި އޮންނަނީ ވެސް ޑިޕްލޮމެޓިކް ޕާސްޕޯޓެކެވެ.
ޝައިޚް ހަސީނާ ވަނީ މިމަހުގެ 5 ވަނަ ދުވަހު މަގާމުން އިސްތިއުފާ ދެއްވުމަށް ފަހު، ބަންގްލަދޭޝް ދޫކުރައްވައި އިންޑިއާގެ ހިމާޔަތް ހޯއްދަވާފައެވެ.
Advertisement
This content is created and paid for by advertisers and does not involve Voice Journalists
