އެމެރިކާގެ ރިޔާސީ އިންތިހާބުގައި އަމިއްލަ ގޮތުން ވާދަކުރާ ރޮބަޓް އެފް ކެނެޑީ ޖޫނިއަރ, އޭނާގެ ކެމްޕޭން ހުއްޓާލައި ރިޕަބްލިކަންގެ ކެނޑިޑޭޓް، ޑޮނަލްޑް ޓްރަމްޕަށް ތާއީދުކުރައްވަން ނިންމަވައިފިއެވެ.
ކެނެޑީ މިކަން އިޢުލާނުކުރިތާ ގަޑިއިރުތަކެއް ފަހުން، އޭނާ ވަނީ އެރިޒޯނާގައި ބޭއްވުނު ޓްރަމްޕްގެ ކެމްޕޭން އިވެންޓެއްގައި ބައިވެރިވެފައެވެ.
މި ނިންމުމާއި ގުޅޭގޮތުން ކެނެޑީ ވިދާޅުވީ އޭނާގެ ހޯދުންތަކުން ދައްކާގޮތުގައި މި އިންތިހާބުގައި އޭނާ ވާދަކުރުމުން ޓްރަމްޕަށް ގެއްލުންވެ، ޑިމޮކްރެޓިކް ގެ ކެނޑިޑޭޓް ކަމަލާ ހެރިސްއަށް ފައިދާވާނެކަމަށް ބެލެވޭ ކަމަށެވެ. އެހެންކަމުން ޓްރަމްޕާ ބަޔަތު ހިއްޕަވަން ނިންމެވީކަމަށް ކެނެޑީ ވިދާޅުވިއެވެ.
ކެނެޑީ މިފަދައިން ވިދާޅުވި ނަމަވެސް، އިންތިހާބާއި ގުޅިގެން ފަހަކަށް އައިސް ކުރެވުނު އާންމު ހޯދުންތަކުން އޭނާ ވާދަކުރުމުން މައި ދެ ޕާޓީގެ ކެންޑިޑޭޓުންނަށް ލިބޭ ތާއީދަށް ބޮޑު ބަދަލެއް އަންނަކަން ފާހަގަކުރެވިފައިނުވާ ކަމަށް އެމެރިކާގެ ނޫސްތަކުން ރިޕޯޓްކުރެއެވެ.
އުމުރުފުޅުން 70 އަހަރުގެ ކެނެޑީ ވިދާޅުވި ގޮތުގައި ޓްރަމްޕްގެ ޓީމާއެކު އޭނާ އެތައް ފަހަރަކު ބައްދަލުކުރެއްވިކަމަށާއި، އެ ބައްދަލުވުންތަކުން އިމިގްރޭޝަންގެ މައްސަލަތަކާއި، ޚިޔާލު ފާޅުކުރުމުގެ މިނިވަންކަމާއި، ހަނގުރާމައިގެ ކަންކަމާ ގުޅޭ މައްސަލަތަކުގައި ދެފަރާތުންވެސް އެއްބަސްވުމަކާ ހަމަޔަށް އާދެވިފައިވާކަމަށެވެ.
ކެނެޑީގެ މި ނިންމުމާއިއެކު، ޓްރަމްޕް ވިދާޅުވީ، އެމެރިކާގެ ރައީސްކަން ލިބިއްޖެނަމަ، ރައީސްގެ ހާއްސަ ކޮމިޝަނެއް އުފައްދަވާނެކަމަށާއި، އެ ކޮމިޝަނުން 1963 ގައި ކުރީގެ ރައީސް ޖޯން އެފް ކެނެޑީ އަވަހާރަކޮށްލުމާ ގުޅޭ ފައިލްތައް ހާމަކުރައްވާނެ ކަމަށެވެ. ޖޯން އެފް ކެނެޑީ އަކީ ރޮބަޓް އެފް ކެނެޑީގެ ބޮޑުބޭބެފުޅެވެ.
ޓްރަމްޕްގެ މި ވާހަކަތަކާ ގުޅިގެން ކެނެޑީ އާއިލާގެ ބައެއް މެމްބަރުން ނުރުހުން ފާޅުކޮށްފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
