ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ މި ސަރުކާރަކީ އިސްލާމްދީނަށް ނަސްރު ދިނުމުގައި ދެމި އޮންނާނެ ސަރުކާރެއް ކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
ދިވެހިރާއްޖޭގެ ދީނީ ޢިލްމުވެރިންގެ އަހަރީ ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، އިސްލާމްދީނުގެ ޚިދުމަތް ދެމެހެއްޓުމަށްޓަކައި މަސައްކަތްކުރާ ކޮންމެ ބޭފުޅަކަށް އެހީތެރިކަން ދިނުމުގެ ބައިވެރިއެއްގެގޮތުގައި އިސްލާމީ ކަންތައްތަކާއި ބެހޭ ވުޒާރާ ދެމި އޮންނާނެ ކަމަށާއި، އެއްވެސް ބޭފުޅެއްގެ ދީނީ ހިދުމަތަށް އުނިކަމެއް އަންނާނެ ކަމެއް އެ ވުޒާރާއިން ނުކުރާނެ ކަމަށެވެ.
"އިސްލާމްދީނުގެ ޚިދުމަތް ދެމެހެއްޓުމަށްޓަކައި މަސައްކަތްކުރާ ކޮންމެ ބޭފުޅަކަށް އެހީތެރިކަން ދިނުމުގެ ބައިވެރިއެއްގެގޮތުގައި ދެމި އޮންނާނެ، އެއްވެސް ބޭފުޅެއްގެ ދީނީ ހިދުމަތަށް އުނިކަމެއް އަންނާނެ ކަމެއް މި ވުޒާރާއަކުން ނުކުރާނެ"
ވަޒީރު ޝަހީމް ވިދާޅުވިއެވެ.
ވަޒީރު ވިދާޅުވީ، އިސްލާމީ ކަންތައްތަކާބެހޭ ވުޒާރާގެ ހުރިހާ ކާމިޔާބީއެއްގެ އެންމެ ބޮޑު ހިއްސާދާރަކީ ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒުކަމަށެވެ.
ރާއްޖޭގައި އިސްލާމްދީނުގެ ކަންތައްތަކަށް ނަސްރުދޭނެ ސަރުކާރެއް ގާއިމްވެފައި އޮތުމަކީ އިސްލާމް ދީނުގެ ޚިދުމަތް ރާއްޖޭގައި ފުޅާކުރުމަށް މީސްތަކުންނާއި ހަމައަށް ހިދާޔަތު ގެންގޮސްދިނުމަށް ލިބޭ ވަރަށް ބޮޑު އަގުހުރި ރަނުގެ ފުރުސަތެއްކަން ވަޒީރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
