ކަނޑުއޮތްގިރިއަކީ އެމްއެންޑީއެފްގެ އެއްވެސް ބިމެއް އުނިނުވެ އިތުރުކުރެވުނު ރަށެއްކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

މަސްވެރިންނަށް ބޭނުންވާ ޖާގަ ހުޅުމާލެ ބަނދަރުން ހަމަޖެއްސުމަށް މަޝްވަރާ ކުރުމަށްފަހު ކަނޑުއޮއްގިރި މިފްކޯއާ ހަވާލުކުރުމާއި ގުޅިގެން ކުރީގެ ދިފާއީ ވަޒީރު މާރިޔާ އަހްމަދު ދީދީ އެކްސްގައި ކުރެއްވި ޕޯސްޓެއްގައި ވަނީ، ކަނޑުއޮއްގިރި އެމްއެންޑީއެފާ ހަވާލުކުރީ މިދިޔަ ސަރުކާރުން އެމްއެންޑީއެފަށް ދިން 120،000 އަކަފޫޓުގެ ބިން މިފްކޯއަށް ދޭގޮތަށްތޯ ސުވާލު އުފައްދާފައެވެ.

މާރިއާގެ މި ޕޯސްޓަށް ރައްދުދެއްވަމުން ދެއްވަމުން ޣައްސާން ވިދާޅުވީ، ކަނޑުއޮއްގިރިއަކީ އެމްއެންޑީއެފްގެ އެއްވެސް ބިމެއް އުނިނުވެ, އިތުރުކުރެވުނު ރަށެއް ކަމަށެވެ.

ކަނޑުއޮތްގިރި އެމްއެންޑީއެފާ ހަވާލުކޮށްފައިވާ ކަމަށް ބުދަ ދުވަހު ފިޝަރީޒް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި  މިނިސްޓަރ އަހުމަދު ޝިޔާމް ވަނީ ވިދާޅުފައެވެ.

އަދި، މިމަހުގެ 4 ވަނަ ދުވަހު ރައީސް އޮފީހުގައި ބޭއްވި ކެބިނެޓް ބައްދަލުވުމުގައި ވަނީ، ކަނޑުއޮތްގިރީގައި މިފްކޯއިން ކުރަމުންދިޔަ މަސައްކަތާއި އެކަށީގެންވާ ބިމެއް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑައެޅުމަށް ނިންމާފައެވެ.  

ހަމައެއާއިއެކު، މިފްކޯއިން ވެސް ވަނީ ކަނޑުއޮތްގިރީގައި މިފްކޯއިން ކުރަމުންގެންދިޔަ މަސައްކަތްތައް ހުޅުމާލޭގައި ކުރުމަށް ބިމެއް ހަމަޖެއްސުމުގެ މަސައްކަތް ކުރިއަށްދާ ކަމަށް ބުނެފައެވެ.