8 ވަނަ އޮފީސް/ކޮމްޕެނީ ހޭންޑްބޯޅަ މުބާރާތުގެ ފިރިހެން ފުރަތަމަ ޑިވިޝަނުގައި މިރޭ އެމްޑަބުލިޔުއެސްސީ އާއި ޕޮލިސް ކުލަބް ކުޅުނު މެޗު ވާދަވެރި ކުޅުމަކަށް ފަހު 27-34 ގެ ނަތީޖައަކުން ކާމިޔާބުކޮށް ޕޮލިސް ކުލަބުން މުބާރާތުގެ ފައިނަލުގެ އުންމީދު އައުކޮށްފިއެވެ.

މުބާރާތުގައި ޕޮލިސް ކުލަބު ކުޅުނު ފުރަތަމަ މެޗުގައި 33-41 ގެ ނަތީޖާއަކުން އެމްޕީއަލް އަތުން އެޓީމު ބަލިވެފައިވާއިރު، އެމްޑަބުލިޔުއެސްސީ ފުރަތަމަ މެޗުގައި ވެމްކޯ އަތުން 17-34 ގެ ނަތީޖާއަކުން އެޓީމު ވަނީ ބަލިވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 12-14 ގެ ނަތީޖާއަކުން ޕޮލިސް ކުލަބު ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ޕޮލިހުން އިތުރު 20 ލަނޑު ކާމިޔާބުކުރިއިރު، މިހާފުގައި އެމްޑަބުލިޔުއެސްސީ އިން ވެސް ވަނީ އިތުރު 15 ލަނޑު ކާމިޔާބުކޮށްފައެވެ.

އެގޮތުން މިމެޗުގައި ޕޮލިސް ކުލަބުގެ މުހައްމަދު ޝައިހާން އިބްރާހިމް 12 ލަނޑު ކާމިޔާބުކުރިއިރު، އެޓީމުގެ އިސްމާއިލް ޒައިދު ވަނީ ހަ ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމު އިބްރާހިމް މުސްފިރު އަދި އިސްމާއިލް އަހުމަދު މިއިން ކޮންމެ ކުޅުންތެރިއަކު ފަސް ލަނޑު ކާމިޔާބުކުރިއިރު، އެޓީމުގެ ޖިނާހް ހާރޫން ތިން ލަނޑު އަދި އަހުމަދު މަހުފޫޒް މުހައްމަދު ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ މުހައްމަދު އަސްލަމް އެވެ.

މީގެ އިތުރުން މިމެޗުގައި އެމްޑަބުލިޔުއެސްސީގެ މުހައްމަދު އަފްއާން އާތިފް 15 ލަނޑު ކާމިޔާބުކުރިއިރު، އެޓީމުގެ އަކްރަމް ރަޝާދު ވަނީ ހަތް ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ހުސެއިން ހަބީބު ދެލަނޑު ކާމިޔާބުކުރިއިރު، އެޓީމުގެ ހުސެއިން ސަވީލް، އަމްރޫން މުހައްމަދު އަދި އަބްދުﷲ ހަސަން ވަހީދު މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޕޮލިސް ކުލަބުގެ މުހައްމަދު ޝައިހާން އިބްރާހިމް އެވެ.

މިނަތީޖާއެކު ކުޅުނު ދެމެޗުން ޕޮލިސް ކުލަބަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ ތިންވަނައިގައެވެ. އަދި މިމެޗުން ބަލިވި އެމްޑަބުލިޔުއެސްސީ ކުޅުނު ދެމެޗުން ވެސް ބަލިވެފައިވާއިރު، އެޓީމު މިވަގުތު އޮތީ ޕޮއިންޓެއް ނުލިބި ލީގު ތާވަލުގެ ފުލުގައެވެ.

މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތުގެ ފިރިހެން ފުރަތަމަ ޑިވިޝަނުގައި ހަތަރު ޓީމަކުން ވާދަކުރަމުން އަންނައިރު، އޭގެތެރޭގައި ހިމެނެނީ އެމްޑަބުލިޔުއެސްސީ އާއި ވެމްކޯގެ އިތުރުން އެމްޕީއެލް އަދި ޕޮލިސް ކުލަބެވެ. އަދި މިޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.