އެމްޑީޕީގެ ވެރިކަން ނިމުނު އިރު، ދިވެހިރާއްޖޭގެ އިޤްތިޞާދު އޮތީ ހަމައަކަށް އެޅި އިތުރަށް ފުޅާވެފައިވާ ކަމަށް އެ ވެރިކަމުގައި ފިނޭންސް މިނިސްޓަރުގެ މަގާމުގައި ހުންނެވި އިބްރާޙީމް އަމީރު ވިދާޅުވެއްޖެެއެވެ. 

ރާއްޖޭގެ އިގްތިޞާދީ ޙާލަތާއިމެދު ކަންބޮޑުވުން ފާޅުކޮށް އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ، މި ސަރުކާރުގެ ނާގާބިލު ކަމުގެ ސަބަބުން، ރާއްޖޭގެ މާލީ ސިޔާސަތުތައް ފެއިލްވަމުންދާ ކަމަށެވެ. އަދި ރާއްޖޭގެ ދަރަނި ބޮޑުވެ، މިއިން ޒަމާނަކު ރިޒާވް ދަށް ނުވާ މިންވަރަށް ދަށްވެފައިވާ ކަމަށާ، ސަރުކާރުން މާލީ ކަންކަން ސިއްރު ކުރަމުންދާ ކަމަށްވެސް އޭނާ ވިދާޅުވިއެވެ. 

މިކަން ކަމުގެ ތަފްސީލް ހާމަކުރައްވަމުން އަމީރު ވިދާޅުވީ، ނިމިދިޔަ ވެރިކަމުގައި ރާއްޖެއަށާ ދުނިޔެއަށްވެސް މިހާތަނަށް ކުރިމަތުވެފައި ނުވާވަރަށް އިގްތިޞާދީ ދަތިތަކާއި ކުރިމަތިވި ކަމަށެވެ. އެގޮތުން، ކޮވިޑްގެ ބަލި މަޑުކަމާއި، ރަޝިއާ-ޔުކްރެއިން ހަނގާމައިގެ ސަބަބުން މުޅި ދުނިޔެއަށްވެސް އިގްތިޞާދީ ބޮޑެތި ދަތިތަކަކާ ކުރިމަތިލާން ޖެހުނު ކަން އޭނާ ފާހަގަކުރެއްވިއެވެ. 

Advertisement

މީގެ އިތުރުން، ކޮވިޑާއި، ރަޝިޔާ-ޔުކްރެއިން ހަމގުރާމައިގައި ކުރިމަތިވި އިގްތިޞާދީ ޝޮކް ތަކާއެކު، ދަރަނި ނަގައިގެންވެސް އެ ގޮންޖެހުންތަކުން ސަލާމަތްވުމަށް މަސައްކަތްލކުރެއްވި ކަމަށް އަމީރު ވިދާޅުވިއެވެ. 

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ކުރީ ފިނޭންސް މިނިސްޓަރ އިބްރާޙީމް އަމީރު ވާހަކަ ދައްކަވަނީ: ފޮޓޯ/ އެމްޑީޕީ

އަމީރު މިފަދައިން ވިދާޅުވެފައިވާއިރު، މިދިޔަ ފަސް އަހަރުގައި، ދަރަނި ދެއްކުމަށްވެސް ދަރަނި ނަގައި، ފާއިތުވެދިޔަ 40 އަހަރު ސަރުކާރަކުން ނުއުފައްދާ މިންވަރަށް ދަރަނި އުފައްދާފައިވާ ކަމަށް އަދުގެ ސަރުކާރުން ބުނެއެވެ. 

އެގޮތުން، މިދިޔަ ސަރުކާރު ނިމުނު އިރު ރާއްޖޭގެ ޖުމްލަ ދަރަނި 120 ބިލިއަނަށް އަރާފައިވާކަން ފާހަގަކޮށްލަންޖެހެއެވެ.