ދުނިޔެއިން މިހާތަނަށް ފެނުނު ދެވަނަ އަށް އެންމެ ބޮޑު ޖަވާހިރު ބޮޓްސްވާނާ އިން ފެނިއްޖެއެވެ.

މި ޖަވާހިރު ފެނުނު ލުކާރާ ޑައިމަންޑް ކޯޕަރޭޝަން ކުންފުނިން ބުނީ، އެއީ 2،492 ކެރެޓުގެ ޖަވާހިރެއް ކަމަށެވެ.

ލުކާރާ ޑައިމަންޑް ކޯޕަރޭޝަނުން ނެރުނު ބަޔާނެއްގައި ބުނެފައިވާ ގޮތުގައި، މި ޑައިމަންޑު ފެނިފައިވަނީ ބޮޓްސްވާނާގެ އިރުމަތީ އުތުރުގައި ހުންނަ ކަރޯވޭ ޑައިމަންޑް މައިންގައި އެކްސްރޭ ޓެކްނޮލޮޖީ ބޭނުންކޮށްގެންނެވެ.

Advertisement

މީގެ އަގު ބަޔާންކޮށްފައި ނުވި ނަމަވެސް ކެރެޓުގެ ގޮތުން ބަލާއިރު، މިއީ 1905 ވަނަ އަހަރު ދެކުނު އެފްރިކާގައި ފެނުނު 3،016 ކެރެޓުގެ ކަލިނަން ޑައިމަންޑަށް ފަހު މިހާތަނަށް ފެނުނު ދެވަނައަށް އެންމެ ބޮޑު ޖަވާހިރެވެ. 

މިއީ 2017 ވަނަ އަހަރު ބެހެއްޓި ބޮޑެތި، އަގުބޮޑު ޖަވާހިރާއި މައުދަންތައް ދެނެގަނެ ރައްކާތެރިކުރުމަށް ބޭނުންކުރާ މެގާ ޑައިމަންޑް ރިކަވަރީ އެކްސްރޭ ޓެކްނޮލޮޖީ ބޭނުންކޮށްގެން ފެނުނު ޖަވާޙިރެއް ކަމަށް ވެސް އެކުންފުނިން ބުނެއެވެ.

ކުންފުނިން ދޫކޮށްފައިވާ ފޮޓޯތަކުން ދައްކާގޮތުގައި މި ޑައިމަންޑްގައި އަތް ތިލައެއްގެ ބޮޑުމިން ހުރެއެވެ.

ބޮޓްސްވާނާގެ ރައީސް މޮކްގްވީޓްސީ މަސީސީއަށް އެ ޖަވާހިރު ދައްކާލާފައިވާއިރު، އެގައުމުގެ ސަރުކާރުން ވެސް ވަނީ އެއީ  ދުނިޔޭގައި ދެވަނައަށް އެންމެ ބޮޑު ޖަވާހިރުކަން ކަށަވަރުކޮށްދީފައެވެ.

ބޮޓްސްވާނާއަކީ ދުނިޔޭގެ އެންމެ ބޮޑެތި ޖަވާހިރު ފެންނަ ޤައުމުތަކުގެ ތެރެއިން އެއް ޤައުމަށް ވާއިރު، މިއީ އެ ޤައުމުގެ މައިގަނޑު އާމްދަނީގެ ވަސީލަތެވެ. އަދި އެ ޤައުމުގެ ޖުމްލަ އުފެއްދުންތެރިކަމުގެ 30 އިންސައްތަ އާއި އެކްސްޕޯޓްގެ 80 އިންސައްތަ ހިއްސާކުރަނީ ޖަވާހިރު ފަދަ މައުދަންތަކެވެ.