ދެ މަހަށްވުރެ ގިނަ ދުވަހު ޖައްވުގައި ތާށިވެފައިތިބި ނާސާގެ ދެ އެސްޓްރޮނޯޓުންނަށް ދުނިޔެއަށް އެނބުރި އާދެވޭނީ 2025 ވަނަ އަހަރުގެ ފެބްރުއަރީ މަހު ކަމަށް ނާސާ އިން ހާމަކޮށްފިއެވެ.

ނާސާއިން ބުނީ އެއިދާރާގެ ދެ އެސްޓްރޮނޯޓުން ކަމަށްވާ ސުނީތާ ވިލިއަމްސް އަދި ބެރީ ވިލްމޯރ ބައިނަލްއަޤްވާމީ ޖައްވީ މަރުކަޒު (އައިއެސްއެސް) އަށް ދަތުރުކުރި ބޯއިންގ ސްޓާލައިނާ އުޅަނދު ބިމަށް އަނބުރާ އަންނާނީ އެއްވެސް މީހަކު ނެތި ހުސްކޮށް ކަމަށެވެ.

މި ދެ އެސްޓްރޮނޯޓުން ޖޫން 5 ވަނަ ދުވަހު ފުރާފައިވަނީ 8 ދުވަހުގެ މިޝަނަކަށް ކަމަށްވީ ނަމަވެސް، މިހާރު އެ ދެ މީހުން ޖައްވުގައި ތިބޭތާ 8 މަސް ވެއްޖެއެވެ.

Advertisement

އައިއެސްއެސް އަށް ދަތުރުކުރަމުންދިޔައިރު ސްޓާލައިނާ އުޅަނދަށް ދިމާވި މައްސަލަތަކުގެ ތެރޭގައި ހީލިއަމް ލީކުވުން ހިމެނެއެވެ. ހީލިއަމްއަކީ ޕްރޮޕަލްޝަން ނިޒާމަށް ތެޔޮ ފޮނުވުމަށް ބޭނުންކުރާ ގޭހެކެވެ. މީގެ އިތުރުން އުޅަނދުގެ އެތައް ތުރަސްޓަރެއް ރަނގަޅަށް މަސައްކަތް ނުކުރުމުގެ މައްސަލަވެސް ދިމާވިއެވެ.

ނާސާއިން ބޮއިންގ އަދި ސްޕޭސްއެކްސްއަށް ވަނީ އެ އިދާރާގެ މަތިންދާބޯޓުވެރިންނަށް ވިޔަފާރީގެ އުސޫލުން ބޭރުމަތީގެ ދަތުރުތައް ފޯރުކޮށްދިނުމަށް ބިލިއަން ޑޮލަރުގެ އެއްބަސްވުންތަކެއް ހަވާލުކޮށްފައެވެ. ބޮއިންގއަށް ލިބުނު އެއްބަސްވުމުގެ އަގަކީ 4.2 ބިލިއަން ޑޮލަރު (3.18 ބިލިއަން ޕައުންޑް) އެވެ. އަދި ބިލިއަނަރު އީލޮން މަސްކް އުފެއްދި ސްޕޭސްއެކްސްއަށް ލިބުނީ 2.6 ބިލިއަން ޑޮލަރެވެ.

ސްޕޭސްއެކްސްއިން މިހާތަނަށް ނާސާއަށް 9 ފަޅުވެރިންގެ ދަތުރު އަދި އިތުރު ބައެއް ވިޔަފާރީގެ ދަތުރުތައް ކޮށްފައިވާއިރު، މިއީ ބޮއިންގއިން ފަޅުވެރިންނާއެކު ކުރި ފުރަތަމަ މަސައްކަތެވެ.

ބޮއިންގ އަދި ނާސާގެ އިންޖިނިއަރުން ވަނީ ސްޓާލައިނާ އުޅަނދުގައި ހުރި ޓެކްނިކަލް މައްސަލަތައް ދެނެގަތުމަށް އެތައް މަސްތަކެއް ހޭދަކޮށްފައެވެ.

އެމީހުން ވަނީ ޖައްވުގައި އާއި ބިމުގައި ތަފާތު ޓެސްޓުތައް ހަދައި، މަޢުލޫމާތު އެއްކުރަމުން ގެންގޮސްފައެވެ. އެމީހުންގެ އުންމީދަކީ މައްސަލަތަކުގެ އަސްލު ސަބަބު ދެނެގަނެ، ސްޓާލައިނާގައި މަތިންދާބޯޓުވެރިން ރައްކާތެރިކަމާއެކު އަނބުރާ ގެނައުމުގެ ގޮތެއް ހޯދުމެވެ.

ހޮނިހިރު ދުވަހު ބޭއްވުނު ނޫސްވެރިންގެ ބައްދަލުވުމެއްގައި ވާހަކަދައްކަވަމުން ނާސާގެ އެޑްމިނިސްޓްރޭޓަރ ބިލް ނެލްސަން ވިދާޅުވީ، މި އުޅަނދަށް ގެންނަންޖެހޭ އިސްލާހުތައް ދެނެގަތުމަށް ބޮއިންގ އިން ނާސާއާ ގާތުން މަސައްކަތްކޮށްފައިވާ ކަމަށެވެ.

މި ދެ އެސްޓްރޮނޯޓުން އައިއެސްއެސްގައި ތިބުމުގެ މުއްދަތު 2025 ގެ ފެބްރުއަރީއާ ހަމައަށް އިތުރުކުރުމަށް ނިންމާފައިވަނީ، އެމީހުންނަށް ސްޕޭސްއެކްސްގެ ކްރޫ ޑްރެގަން އުޅަނދެއްގައި އެނބުރި އައުމަށް ފުރުސަތު ދިނުމަށެވެ.

އިތުރުކުރެވުނު މުއްދަތުގެ ސަބަބުން ސްޕޭސްއެކްސްއަށް އެމީހުންގެ ދެން އޮތް އުޅަނދު ފޮނުވުމަށް ފުރުސަތު ލިބޭނެއެވެ. މި އުޅަނދު ފުރުމަށް ހަމަޖެހިފައިވަނީ ސެޕްޓެމްބަރު މަހުގެ ފަހުކޮޅުގައެވެ.

އެ އުޅަނދުގައި 4 މަތިންދާބޯޓުވެރިން ތިބުމަށް ހަމަޖެހިފައިވީ ނަމަވެސް، ޖައްވުގައި ތާށިވެފައި ތިބި ދެ އެސްޓްރްނޯޓުންނަށް ޖާގަ ދިނުމަށްޓަކައި، މިހާރު ދަތުރުކުރާނީ 2 މަތިންދާބޯޓުވެރިންނެވެ. އެހެން ހެދުމުން، ވިލްމޯރ އަދި ވިލިއަމްސްއަށް އެ އުޅަނދުގައި އެނބުރި އައުމަށް ޖާގަ ލިބޭނެއެވެ. މި ދަތުރު ނިމުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގެ ފަހުކޮޅުގައެވެ.