މި ސަރުކާރުގެ މާލީ ހިސާބުތައް ހާމަނުކުރާ ކަމަށް ބުނެ، ދަ ޑިމޮކްރެޓްސް އިން ކަންބޮޑުވުން ފާޅުކޮށްފިއެވެ.

މިއަދު އެ ޕާޓީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެސްޓީއޯގެ ކުރީގެ މެނޭޖިންގ ޑިރެކްޓަރ އަދި ޑިމޮކްރެޓްސް އުފެއްދުމުގައި އިސްކޮށް ހުންނެވި ހުސެއިން އަމްރު ވިދާޅުވީ، މި ސަރުކާރު ވެރިކަމާ ހަވާލުވުމަށްފަހު މި ވީ ދުވަސްތަކުގައި ސަރުކާރުގެ ސިޔާސަތުތައް ހުރިގޮތުން މާލީކަންކަން ބޮއްސުން ލައިގެން ގޮސްފައިވާކަމަށެވެ. އަމްރު ވިދާޅުވީ، މިދިޔަ ޖޫން މަހުން ފެށިގެން ސަރުކާރުގެ މާލީ ހިސާބު ހާމަނުކުރާކަމަށެވެ.

އަމްރު ވިދާޅުވީ، އެއީ ގާނޫނުގައި ކަނޑައެޅިފައިވާ ކުރަން ޖެހޭ ކަމަށާއި، އެކަން އެފަދައިން ނުކުރާތީ ރާއްޖޭގެ ހާލަތު އޮތް ހިސާބު ނޭނގޭ ކަމަށެވެ.

އިއްޔެ ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވެސް އެކަން ހާމަކުނުކުރެވިގެން އުޅެނީ ބައެއް ހިސާބުތަކުގައި މައްސަލަ ހުރުމުން ކަމަށް ބުނި ކަމަށާއި، މިއީ ކަންބޮޑުވާން ޖެހޭ ކަމެއް ކަމަށް އަމްރު ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ވިދާޅުވީ ދައުލަތުގެ ދަރަނި އެހާބޮޑުވެގެން ދިޔައިރު، އެކަމަށް އަވަސްގޮތެއްގައި ފިޔަވަޅެއް ނޭޅުމީ ސަރުކާރުގެ މައްސަލައެއް ކަމަށާއި އަވަސްގޮތެއްގައި ހަރަދުކުޑަކުރުމަށް ފިޔަވަޅުތައް އަޅަންޖެހޭކަމަށެވެ.

އިލްޔާސް ވިދާޅުވީ މިއީ ހަރަދުތައް ކުޑަކުރަންޖެހޭ ވަގުތު ކަމަށާއި، ދަރަނި ރީސްޓަކްޗަރކުރުން ނޫންގޮތެއް ނެތްކަމަށެވެ. މިގޮތުން ދަރަނި ރީފައިނޭންސްކޮށްގެން މިހާލަތުގައި ކުރެވޭނޭ ކަމެއް ނެތްކަމަށްވެސް އޭނާ ފާހަގަކުރެއްވިއެވެ.