ބައިނަލް އަގުވާމީ ކުޅިވަރުގެ މައިދާނުގައި ދިވެހިން ވަނީ ފަޚްރުވެރި އެތަކެއް ކާމިޔާބީތަކެއް ހޯދާފައެވެ. އޭގެތެރޭގައި ސަރަހައްދީ އަދި ދުނިޔޭގެ ފެންވަރުގައި ހޯދާފައިވާ ކާމިޔާބީތައް ވެސް ހިމެނެއެވެ. އޭގެތެރޭގައި ފުޓްބޯޅަ، ބޯޑީބިލްޑިން، ކެރަމް އަދި ސާފިންގެ އިތުރުން ބެޑްމިންޓަން، ޓޭބަލް ޓެނިސް އަދި އެތްލެޓިކްސްގައި ވެސް ދިވެހި އެތްލީޓުން ވަނީ ގައުމު ފަޚުރުވެރިކޮށްދީފައެވެ.

ނަމަވެސް މިހާތަނަށް ކުޅިވަރުގެ މައިދާނުގައި ދިވެހިންނަށް އެންމެ ބޮޑު އުފަލެއް ނުވަތަ ޝަރަފެއް ހޯދައިދިނީ އަލީ އަޝްފާގުއޭ ބުނުމަކީ ދޮގަކަށް ނުވާނެ އެވެ. އެއީ ސަބަބެއް ނެތިއެއް ނޫނެވެ.

ދިވެހިގެ މެދުގައި އެންމެ މަގުބޫލް ކުޅިވަރު ފުޓްބޯޅަ އިން އަޝްފާގު ހޯދާފައިވާ ކާމިޔާބުތަކަކީ މުޅި ދުނިޔޭގެ ފެންވަރުގައި ވެސް ފާހަގަކޮށްލެވޭ ފަދަ ބޮޑެތި ކާމިޔާބީތަކެކެވެ. އޭގެ ތެރޭގައި، މިގަރުނު އެންމެ ގިނަ ހެޓްރިކް ހެދި ކުޅުންތެރިންގެ ލިސްޓުގެ ތިންވަނާގައި މެސީ އާއި ރޮނާލްޑޯގެ ފަހަތުން ހިމެނުމަކީ މިކާމިޔާބީތަކަށް އިތުރުވެގެންދިޔަ ބޮޅެކެވެ.

Advertisement

މީގެ އިތުރުން ސަރަހައްދީ އަދި ދުނިޔޭގެ ފެންވަރުގައި އަޝްފާގް ހޯދާފައިވާ ކާމިޔާބީތަކުގެ ތެރޭގައި 2012 ވަނަ އަހަރު އީއެސްޕީއެން އިން ހޮވި އެންމެ އުންމީދީ ޒުވާން 10 ކުޅުންތެރިންގެ ތެރޭގައި ހިމެނުމާއި، މެލޭޝިއާ ސުޕަރ ލީގުގައި އާޖެންޓީނަގެ ކުރީގެ ތަރި ޕައުލޯ އައިމާ ކުޅެމުންދަނިކޮށް 2014 ވަނަ އަހަރުގެ މެލޭޝިއާ ލީގު ބެސްޓް ފޮރިން ޕްލޭޔަރ ގެ މަގާމު ހޯދުން ހިމެނެއެވެ.

މީގެ އިތުރުން ގައުމީ ޓީމަށް ހަ ހެޓްރިކް ކާމިޔާބުކޮށްދީފައިވާއިރު، އޭގެ ތެރޭގައި 2013 ވަނަ އަހަރު ސާފް ޗެންޕިއަންޝިޕްގައި، ސްރީލަންކާ ކޮޅަށް ކާމިޔާބުކުރި ހަ ލަނޑަކީ ސަރަހައްދީ ފެންވަރުގެ ފުޓްބޯޅަ މުބާރާތެއްގައި މިހާތަނަށް އެއްމެޗެއްގައި، (އޭޝިއާއަށް ނިސްބަތްވާ ކުޅުންތެރިއަކު) އެންމެ ގިނަ ލަނޑުޖެހުމުގެ ރެކޯޑެވެ. މީގެ އިތުރުން 2013 ވަނަ އަހަރު އިންޑޮނޭޝިއާގައި އެގައުމުގެ ޕާސިބޯއާއި ދެކޮޅަށް ކުޅުނު މެޗުގައި ކާމިޔާބުކުރި ފަސް ލަނޑާއެކު އޭއެފްސީ ކަޕްގެ ތާރީޚްގައި އެއް މެޗެއްގައި އެންމެ ގިނަ ލަނޑުޖެހުމުގެ ރެކޯޑް ވެސް އޮތީ އަޝްފާގް އަތުގައެވެ. 

އުމުރުން 15 އަހަރުގައި 2001 ވަނަ އަހަރު ކުލަބު ވެލެންސިއާ އިން ފުޓްބޯޅަ ކެރިއަރުފެށި އަޝްފާގް ގައުމީ ޓީމަށް އެންމެ ފުރަތަމަ ކުޅުނު މެޗަކީ 2003 ވަނަ އަހަރު ވޯލްޑްކަޕް ކޮލިފައިންގ މޮންގޯލިއާއި ދެކޮޅަށް ކުޅުނު މެޗެވެ. އަދި އެމެޗުގައި އަޝްފާގު ހަތަރު ލަނޑު ކާމިޔާބުކުރިއިރު، އޭގެ ފަހުން މިހާތަނަށް ގައުމީ ޓީމަށް 98 މެޗުކުޅެ 58 ލަނޑު ކާމިޔާބުކޮށްދީފައެވެ. އަދި މީގެ އިތުރުން ކުލަބު ކެރިއަރުގައި މިހާތަނަށް 457 މެޗު ކުޅެ 409 ލަނޑު ވަނީ ކާމިޔާބުކޮށްފައެވެ.

މީގެ އިތުރުން އަޝްފާގްގެ ފުޓްބޯޅަ ކެރިއަރުގައި މިހާތަނަށް ރާއްޖޭގެ އެންމެ މޮޅު ކުޅުންތެރިއާގެ މަގާމް ފަސް ފަހަރު ހޯދާފައިވާއިރު، އެންމެ ގިނަ ލަނޑުޖެހި ކުޅުބްތެރިއާއަށް ދޭ ރަން ބޫޓް ހަތް ފަހަރު ވަނީ ކާމިޔާބުކޮށްފައެވެ.