ބީޖީ ސްޕޯޓްސް ކުލަބު އެކަޑަމީގެ ފަރާތުން ބޭރުގެ ތަޖުރިބާކަރު ޓްރެއިނަރަކާއެކު ތިންދުވަހުގެ މުއްދަތައް ކުރިއަށް ގެންދިޔަ ޚާއްސަ ޓްރެއިނިންގ ޕްރޮގުރާމް ކާމިޔާބުކަމާއެކު ނިންމާލައިފިއެވެ.

ބީޖީ އެކަޑަމީގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތުދިން ގޮތުގައި އޮގަސްޓް 23 އިން 26 އަށް ކުރިއަށް ގެންދިޔަ މިޕްރޮގްރާމުގައި ވިއެޓްނާމުގެ ތަޖުރިބާކާރު ފުޓްބޯޅަ ޓްރެއިނަރެއްކަމަށްވާ ގުޔެން އަންހް ޓޫ ވަނީ ބައިވެރިވެފައެވެ.

ޓޫ އަކީ ވިއެޓްނާމުގައި ފުޓްބޯޅަ އެކަޑަމީއެއް ހިންގަމުން އަންނަ ކުޅިވަރުގެ ދައިރާއިން މަތީތައުލީ ހާސިލްކުރައްވައިގެން ހުންނެވި، ވަރަށް ތަޖުރިބާކާރު ބޭފުޅެކެވެ. އަދި ބީޖީ އެކަޑެމީގެ ދައުވަތަކަށް ޓޫ ރާއްޖެއަށް ކުރި ތިންދުވަހުގެ މިދަތުރުގައި އެކަޑަމީގެ ޓްރެއިނިންގ ސެޝަންތަކުގައި ޓޫ ވަނީ އަމަލީގޮތުން ބައިވެރިވެ އޭނަގެ ތަޖުރިބާ އެކަޑަމީގެ ކުޅުންތެރިންގެ އިތުރުން ބީޖީ އެކަޑަމީގެ ކޯޗުންނާއި ހިއްސާކޮށްފައެވެ.

Advertisement

ޓޫގެ ދަތުރާއި ބެހޭގޮތުން އިތުރަށް ވާހަކަދައްކަމުން ބީޖީ އެކަޑަމީގެ ފަރާތުން ވާހަކަދެއްކި އޮފިޝަލް ބުނީ ޓޫގެ އެހީތެރިކަމާއެކު ކުރިއަށް ގެންދިޔަ ތިން ދުވަހުގެ ޕްރޮގުރާމަކީ ވަރަށް ކާމިޔާބު ޕްރޮގުރާމެއްކަމަށެވެ. ތިން ދުވަސް ފުލްކޮށް ދިޔައީ،ހެނދުނާއި، މެންދުރު އަދި ހަވީރުގެ އިތުރުން ރޭނގަޑު ކުރިއަށް ގެންދިޔަ ސެޝަންތަކުގައި އެކަޑަމީގެ އަށް އަހަރުންދަށާއި، 10، 12، 14 އަދި 16 އަހަރުންދަށުގެ ކުދިން ބައިވެރިވެފައިވެއެވެ.

ބީޖީ ސްޕޯޓްސް އެކަޑަމީއަކީ ރާއްޖޭގައި ހުނަރުވެރި ފުޓްބޯޅަ ޖީލެއް ބިނާކުރުމަށް ވަރަށް ފުޅާ ދައިރާއެއްގައި މަސައްކަތްކުރަމުން އަންނަ އެކަޑަމީއެކެވެ. އެގޮތުން ރާއްޖޭގެ ތަޖުރިބާކަރު ކޯޗުންގެ އިރުޝާދާއެކު ރާއްޖެއާއި ރާއްޖެއިން ބޭރުން އެކަމީގެ ކުދިންނަށް ތަޖުރިބާއާއި ވާދަވެރި ފުރުސަތުތަކެއް ހޯދައިދިނުމުގެ ގޮތުން ރާއްޖެއިން ބޭރުގައި ބޭއްވޭ އެކަޑަމީތަކުގެ ގިނަ މުބާރާތްތަކެއްގައި ބީޖީ ސްޕޯޓްސް އެކަޑަމީގެ އެކި އުމުރުފުރާތަކުގެ ޓީމުތައް މިހާރު ވެސް އަންނަނީ ބައިވެރިވަމުންނެވެ.