ބޭންކް އޮފް މޯލްޑިވްސްއަށް އޮޅިގެން އަނެއްކާވެސް ބައެއްގެ އެކައުންޓަށް އިތުރަށް ފައިސާތަކެއް ޖަމާކޮށްފިއެވެ.

ބީއެމްއެލަށް މިފަހަރު މި މައްސަލަ ދިމާވީ އުމުރުން 65 އަހަރުން މަތީ މީހުންގެ އެކައުންޓަށް ޕެންޝަން ފައިސާ ޖަމާކުރުމުގެ ތެރެއިންނެވެ. އެގޮތުން ބައެއް މީހުންގެ އެކައުންޓަށް ވަނީ ޖަމާކުރަންޖެހޭ އަދަދުގެ ތިން ގުނަ ޖަމާކޮށްފައެވެ. 

މިގޮތުން އާއްމުކޮށް 5،000 ރުފިޔާ ޖަމާކުރަންޖެހޭ މީހުންގެ އެކަންޓްތަކަށް ވަނީ 15،000 ރުފިޔާގެ މަގުން ފައިސާ ޖަމާކޮށްފައެވެ. މޯލްޑިވްސް ޕެންޝަން އޮފީހުގެ ބޭންކަރަކީ ބޭންކް އޮފް މޯލްޑިވްސްއެވެ. އެހެންކަމުން ޕެންޝަނަރުންގެ އެކައުންޓްތަކަށް ފައިސާ ޖަމާކުރުމުގެ ކަންކަން ކުރިއަށްގެންދަނީ ބޭންކުން ކަމަށް ޕެންޝަން އޮފީހުން ބުނެއެވެ.

މިކަމާ ގުޅޭގޮތުން ބީއެމްއެލުން އަދި ވަކިއެއްޗެއް ބުނެފައެއް ނުވެއެވެ. މި ފަހަކުންވެސް ބީއެމްއެލްގެ ބައެއް އެކައުންޓްތަކަށް ވަނީ ބިލިއަނުން ފައިސާ ޖަމާވެފައެވެ. ނަމަވެސް ކުޑަ ވަގުތުކޮޅެއްގެ ތެރޭގައި ބީއެމްއެލުން ވަނީ ޖަމާކުރި އަދަދު އަލުން އަނބުރާ އިއާދަކޮށްފައެވެ. 

މިކަމާ ގުޅޭގޮތުން ޤައުމީ ބޭންކުން އޭރު ބުނެފައިވަނީ އިތުރަށް ފައިސާ ޖަމާކުރެވުނީ މުއައްޒަފެއްގެ މައްސަލައަކުންކަމަށް ބުނެފައެވެ. 

ބީއެމްއެލްގެ ބައެއްގެ އެކައުންޓްތަކަށް އޮޅިގެން އިތުރަށް ފައިސާ ޖަމާވުމުގެ މައްސަލައެއް ފެންމަތިވެފައިވާއިރު، މިދުވަސްވަރަކީ ޤައުމީ ބޭންކަށް ގޮންޖެހުންތައް ބޮޑު ދުވަސްވަރެއްކަން ފާހަގަކޮށްލެވެއެވެ.