އެސްޓީއޯގެ ސަބްސިޑިއަރީ ކުންފުންޏެއްގެ ގޮތުގައި ފެނަކަ ހަމަޖެއްސުމުން ލިބޭނެ ގެއްލުމެއް ނެތްކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވެއްޖެއެވެ.
ސަރުކާރުން ވަނީ އެސްޓީއޯގެ ސަބްސިޑިއަރީ ކުންފުންޏެއްގެ ގޮތުގައި ފެނަކަ ހަމަޖެއްސުމަށް ނިންމާފައެވެ. ފެނަކައަކީ ސަރުކާރުގެ ކުންފުނިތަކުގެ ތެރެއިން އެންމެބޮޑު ދަރަންޏެއް އޮތް ކުންފުންޏެވެ. އަދި ފެނަކައަކީ އެސްޓިއޯއަށް އެންމެބޮޑަށް ދަރާއޮތް އެއް ކުންފުންޏެވެ.
އެސްޓީއޯ ދަށުން ހިންގާ ކުންފުންޏެއްގެ ގޮތުގައި ފެނަކަ ހަމަޖެއްސުމާ ގުޅިގެން އެސްޓީއޯގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޝިމާދު ވިދާޅުވީ، ފެނަކަ އަކީ އެސްޓީއޯއަށް މާލީގޮތުން ހުރި ބުރައަކަށް ނުވާނޭކަމަށެވެ. މީގެ ކުރިން ސަރުކާރުން ވަނީ މިފްކޯވެސް އެސްޓީއޯގެ ދަށަށް ބަދަލުކޮށްފައެވެ. އޭގެ ސަބަބުން އެސްޓީއޯއަށް މާލީގޮތުން ގޮންޖެހުންތަކާ ދިމާވިއެވެ.
ޝިމާދު ވިދާޅުވީ ވިޔަފާރީގެ ގޮތުން މިފްކޯ އާއި ފެނަކަ އަކީ ވަރަށް ތަފާތު ދެ ކުންފުންޏެއް ކަމަށެވެ. މިގޮތުން މިފްކޯއަކީ މަހުގެ ވިޔަފާރިކުރާ ކުންފުންޏެއްކަން ފާހަގަކުރައްވަމުން ޝިމާދު ވިދާޅުވީ އެއީ އެސްޓީއޯއިން ކުރަމުން އަންނަ ވިޔަފާރިއާ ތަފާތު ކަމެއް ކަމަށެވެ. ފެނަކަ އަކީ އެސްޓީއޯ އާ ވަރަށް ގުޅުންހުރި ކުންފުންޏެއްކަން ފާހަގަކުރައްވަމުން ޝިމާދު ވިދާޅުވީ ރައްޖެއަށް އެންމެގިނައިން ހަކަތައިގެ ގޮތުގައި ބޭނުންކުރާ ތެލުގެ ބާވަތްތަކުގެ ތެރެއިން ޑީސަލް އެންމެގިނައިން ބޭނުންކުރާ އެއް ކުންފުންޏަކީ ފެނަކަ ކަމަށެވެ. އެހެންކަމުން ދެކުންފުނީގެ ވިޔަފާރިއަށް ބަލައި ފެނަކައަކީ މާލީގޮތުން އެސްޓީއޯއަށް ބުރައަކަށް ނުވާނޭކަމަސް ޝިމާދު ފާހަގަކުރެއްވިއެވެ.
ޝިމާދު ވިދާޅުވީ ފެނަކައިގައި ދަރަނި އޮތްނަމަވެސް ޕްލޭނަކާއެކު އެކަން ހަމަޔަކަށް އެޅުވުމުގެ ފުރުސަތު އެބައޮތް ކަމަށެވެ. އެސްޓީއޯގައިވާ ފެނަކައިގެ ދަރަނި ބޮޑުވެގެންދިޔައީ މީގެކުރިން ބިލްތައް ދައްކަމުން އައިސް އެކަން ހުއްޓާލުމުންކަމަށްވެސް ޝިމާދު ވިދާޅުވިއެވެ.
ކުރިންސުރެ އެބަހުރި އެކިއުމުލޭޓެޑް ދަރަނިތަކެއް. އަޅުގަނޑުމެންނަށް ޤަބޫލުކުރެވެނީ އެސްޓީއޯދަށަށް ފެނަކަ ބަދަލުކުރެވިގެން ފެނަކައަށް މި އންނަ އެފިޝިއަންސިއާ ރެޑިއުސްވާ ކޮސްޓުން އަޅުގަނޑުމެނަށް ދަރަނީގެ ބޮޑުބައި ދިގު ރާސްތާއެއްގައި ރިކަވާ ކުރެވޭނޭކަމަށް.
ޝިމާދު ވިދާޅުވިއެވެ.
ޝިމާދު ވިދާޅުވީ އެންމެ ފުރަތަމަ ފެނަކަ ހިންގަމުން އައީ ރަނގަޅަށް ކަމަށާއި، ހިންގުމުގެ އޮނިގަނޑުވެސް ރަނގަޅުކަން ފާހަގަކުރެވޭ ކަމަށެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ފެނަކައިގެ މެނޭޖިންގ ޑިރެކްޓަރު މުއާޒު ރަޝީދު ވިދާޅުވީ، އެސްޓީއޯގެ ދަށަށް ފެނަކަ ބަދަލުވެގެން ދިއުމުން ފައިދާތަކެއް ލިބޭނޭ ކަމަށެވެ. މިގޮތުން އިއާދަކުރަނިވި ހަކަތަ ބޭނުންކޮށްގެން ކަރަންޓް ފޯރުކޮށްދިނުމަށް ކުރަންޖެހޭ އިންވެސްޓަމަންޓުތައް ކުރެވިގެންދާނޭ ކަމަށެވެ. ފެނަކައިން ކަރަންޓްގެ ހިދުމަތްތައް ދިނުމުގައި އިއާދަކުރަނިވި ހަކަތަ ބޭނުންކުރުމުން އެކުންފުނިން ތެލަށް ކުރަމުން އަންނަ ހަރަދުތައް އެތައް ތަނަކުން ކުޑަވެގެންދާނޭކަން މުއާޒު ވަނީ ފާހަގަކުރައްވާފައެވެ.
އެސްޓީއޯގެ މިދިޔަ އަހަރުގެ މާލީ ހިސާބުތަކަށް ބަލާއިރު، އެކުންފުންޏަށް އެންމެބޮޑަށް ދަރާއޮތީ، ފެނަކަ އެވެ. މިދިޔަ އަހަރު ނިމުނުއިރު، އެސްޓީއޯގައިވާ ފެނަކައިގެ ދަރަނި އުޅެނީ 1.9 ބިލިއަން ރުފިޔާގައެވެ.
Advertisement
This content is created and paid for by advertisers and does not involve Voice Journalists
