ރާއްޖޭގައި ގަވާއިދާއި ޚިލާފަށް އުޅޭ ބިދޭސީންގެ މައްސަލަ ކޮންޓްރޯލް ކުރުމަށްޓަކައި އިމިގްރޭޝަނާއި ފުލުހުން ގުޅިގެން ކުރިއަށްގެންދާ އޮޕަރޭޝަނާއި ގުޅިގެން، ބިދޭސީން ފިލަން އަތޮޅުތެރޭގެ ރަށްތަކަށް ދާން ފަށައިފިއެވެ.
ގަވާއިދާއި ޚިލާފަށް ހިންގާ އެތައް ވިޔަފާރިއެއް ބަންދުކޮށް، ނުގަވާއިދުން އުޅެމުންދިޔަ އެތައް ބިދޭސީން ހަމައެކަނި މިދިޔަ ހަފްތާގެ ތެރޭގައި ވެސް ޑީޕޯޓްކޮށްލާފައިވާއިރު، މި އޮޕަރޭޝަންގެ ދަށުން އިމިގްރޭޝަންގެ 200 އަށް ވުރެ ގިނަ އޮފިސަރުން އަންނަނީ މާލޭގެ އެކި ސަރަހައްދުތަކުގައި ހަރަކާތްތެރި ވަމުންނެވެ.
އިމިގްރޭޝަންގެ އިންސްޕެކްޝަނެއްގެ ތެރެއިން-- ފޮޓޯ: އިމިގްރޭޝަން
މިކަމާއި ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އިމިގްރޭޝަންގެ ކޮންޓްރޯލަރ މުހައްމަދު ޝައްމާން ވަހީދު ވިދާޅުވީ، މި އޮޕަރޭޝަނާއި ގުޅިގެން ބިދޭސީން ބައެއް ރަށްރަށަށް ފިލައިގެންދާ މައްސަލަ އެ އިދާރާއަށް ވެސް ފާހަގަކުރެވިފައިވާ ކަމަށާއި، ކުޅުދުއްފުށި ސިޓީ ކައުންސިލުން ވެސް އެކަން ފާހަގަކޮށްފައިވާ ކަމަށެވެ.
"އަޅުގަނޑުމެންގެ ހުރިހާ އޮފިސަރުންވެސް، ވަކި ޑިޕާޓްމެންޓް އެއް ނުކިޔަމާ. ހުރިހާ އޮފިސަރުންވެސް މިކަމަށްވަރަށް މޯޓިވޭޓެޑް. މިއީ ގައުމީ ހަރަކާތެއްގެ ގޮތުގައި އަޅުގަނޑުމެން އެންމެންވެސް ގަބޫލުކުރަނީ،"
ޝައްމާން ވިދާޅުވިއެވެ.
ޝައްމާން ވިދާޅުވީ، މިއީ ފެށުމެއް ކަމަށާއި، ކުރިއަށް އޮތްތަނުގައި ވެސް މިފަދަ އިންސްޕެކްޝަންތައް ކުރިއަށް ގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
