ރާއްޖޭގައި އުޅުއްވާ ސަފީރުންނާއި އެބޭފުޅުންގެ ޢާއިލާތަކަށް ގޯނާ ކުރުމަކީ ފަލަޞްޠީނަށް ނަޞްރު ދިނުމެއް ނޫންކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

ވަޒީރު ޝަހީމް މިފަދައިން ވިދާޅުވީ، ރާއްޖޭގައި ހުރި ބައެއް އެމްބަސީތައް ކައިރިއަށް ގޮސް އެމްބަސީތަކާއި ސަފީރުންނަށް އުނދަގޫކޮށް ފުލުހުންގެ ވާޖިބަށް ހުރަސްއެޅޭހެން އިޒްރޭލާ ދެކޮޅަށް އަޑު އުފުލަމުންދިޔަ ދެ އަންހެނަކު ހައްޔަރު ކުރުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.

މި މައްސަލައާއި ގުޅިގެން ފުލުހުން ހައްޔަރުކޮށްފައިވަނީ ޑރ. މުޙައްމަދު އިޔާޒުގެ އަނބިކަނބަލުން ޢާއިޝަތު ޝާދިޔާ (47) އާއި ޑރ. ޝަޒްރާ އިބްރާހީމް (36) އެވެ.

Advertisement

މިކަމާއި ގުޅިގެން ވަޒީރު ޝަހީމް ވިދާޅުވީ، ރާއްޖޭގައި އުޅުއްވާ ސަފީރުންނާއި އެބޭފުޅުންގެ ޢާއިލާތަކަށް ގޯނާ ކުރުމަކީ ފަލަޞްޠީނަށް ނަޞްރު ދިނުމެއް ނޫންކަމަށާއި، އެތައް ދުވަހެއް ވަންދެން ވަކި ސަފީރެއްގެ ގޭދޮށުގައި އަޑުގަދަކޮށް ރާއްޖެއިން ފައިބަން ގޮވައި އެބޭފުޅާއާއި އާއިލާއަށް ބިރު ދެއްކުމަކީ އިންސާފެއް ނޫންކަމަށެވެ.

ހަމައެއާއިއެކު، ވަޒީރު ޝަހީމް ވިދާޅުވީ، ސަފީރެއްގެ ގޭގެ އިން ފަހަނައަޅައި، ގޭތެރެއަށް ކުނި އެޅުމަކީ ފަލަސްތީނަށް ނަސްރު ދިނުންނޫން ކަމަށާއި، މިއީ ދުނިޔޭގެ އެއްވެސް ގައުމެއްގައި އެކަން ހިނގާ ގޮތް ނޫން ކަމަށެވެ.

ރަނގަޅު ގޮތް ބުނެދޭން ތިބޭ މީހުން ހަގީގަތް އޮޅުވާލުމަކީ އިސްލާމްދީނަށް ދެވޭނެ އެންމެ ބޮޑު ގެއްލުންކަމަށް ވަޒީރު ޝަހީމް ވިދާޅުވިއެވެ.

ރޭގައި މި ދެ އަންހެނުން ހައްޔަރުކޮށްފައިވާއިރު، އެކަމާއި ގުޅިގެން ފުލުހުން ބުނީ، އެމީހުން ހައްޔަރުކުރީ، ޑިޕްލޮމެޓިކް މިޝަންތަކުގެ ކައިރީގައި ތަކުރާރުކޮށް އެއްވެ،އަޑުގަދަކުރާ ބޭނުންކޮށްގެން ހަޅޭއްލެވުމާއި ބޭއަދަބީ ބަހުރުވައިން މުޢާމަލާތްކުރުމާއި ގުޅިގެން ކަމަށެވެ.

ހަމައެއާއިއެކު، ވަކި ސަފީރަކަށް އުނދަގޫކުރުމުގެ އަމަލުތަކެއް ހިންގިކަމަށް ތުހުމަތުކޮށްފައިވާއިރު، ފުލުހުން ބުނީ، ފުލުހުންގެ އިރުޝާދުތަކަށް ތަބާނުވުމަކީވެސް ހައްޔަރުކުރުމަށް މެދުވެރިވި އެއް ސަބަބު ކަމަށެވެ.