ސަޢޫދީ ޢަރަބިއްޔާގެ އެމްބަސީއާއި، ސަފީރުގެ ގެކޮޅު ކައިރީގައި ތިބެގެން ސަފީރަށާއި، ސަޢޫދީ ޢަރަބިއްޔާއަށް ހުތުރު ބަސްތައް ރައްދުކުރުމަކީ ކޮން ދީނެއްގައި އޮތް ކަމެއްތޯ އިސްލާމީ މަރުކަޒުގެ އިމާމް ޝެއިޚް މުހައްމަދު ލަޠީފު ސުވާލު އުފައްދަވައިފިއެވެ.
ޝައިޚް މުހައްމަދު ލަޠީފް މިފަދައިން ވިދާޅުވީ، ރާއްޖޭގައި ހުރި ބައެއް އެމްބަސީތައް ކައިރިއަށް ގޮސް އެމްބަސީތަކާއި ސަފީރުންނަށް އުނދަގޫކޮށް ފުލުހުންގެ ވާޖިބަށް ހުރަސްއެޅޭހެން އިޒްރޭލާ ދެކޮޅަށް އަޑު އުފުލަމުންދިޔަ ދެ އަންހެނަކު ހައްޔަރު ކުރުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.
"ރާއްޖޭގައި ޤާއިމުވެފައިހުރި ބައެއް އެމްބަސީތަކާއި، ވަކިން ޚާއްޞަކޮށް ސަޢޫދީ ޢަރަބިއްޔާގެ އެމްބަސީއާއި، ސަފީރުގެ ގެކޮޅު ކައިރީގައި އަންހެން ބަޔަކު ތިބެގެން ސަފީރަށާއި، ސަޢޫދީ ޢަރަބިއްޔާއަށް ހުތުރު ބަސްތައް ރައްދުކޮށް، މިޤައުމުން ފައިބައިގެން ދިޔުމަށް ގޮވައި، ސަފީރުގެ ގެކޮޅަށް އޭތި މީތި އަޅައި، އަޑުގަދަކޮށް، އަނބިދަރިން ބިރުގަންނަ ޒާތުގެ ޢަމަލުތައް ހިންގުމަކީ، ކޮން ދީނެއް، މިއްލަތެއް، މަޒުހަބެއްގައި އޮތް ކަމެއްތޯ؟"
ޝެއިޚް މުހައްމަދު ލަޠީފު ވިދާޅުވިއެވެ.
މިގޮތުން ޝައިޚް ވަނީ މިޤައުމުން އެބަޔަކަށް އަމާންކަންދީ ޢަހުދުނާމާއެއްގެ ދަށުގައިތިބޭ ޣައިރު މުސްލިމުންނަށް އެއްވެސް އުނދަގުލެއްކުރުން ހުއްދަނުވާއިރު، ހާއްސަކޮށް މުސްލިމު ބަޔަކަށް މިފަދައިން އުނދަގޫކުރުން ހުއްދަވާނީ ކޮންފަދައަކުންތޯ ސުވާލު އުފައްދަވާފައެވެ.
ނުބައި މަޤްޞަދުތަކެއް ޙާޞިލުކުރުމަށް، މި އުޅެނީ ޤުދުސްގެ ދިފާޢުގައި ކަމަށް ބުނެ، ހިންގާ ޖަރީމާތައް ވަގުތުން ހުއްޓާލުމަށާއި، ފަސާދައަށް ޖާގަ ނުދިނުމަށް ޝެއިޚް މުހައްމަދު ލަޠީފު ގޮވާލެއްވިއެވެ.
މި މައްސަލައާއި ގުޅިގެން ދެ އަންހެނުން ހައްޔަރުކޮށްފައިވާއިރު، އެކަމާއި ގުޅިގެން ފުލުހުން ބުނީ، އެމީހުން ހައްޔަރުކުރީ، ޑިޕްލޮމެޓިކް މިޝަންތަކުގެ ކައިރީގައި ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި ބޭއަދަބީ ބަހުރުވައިން މުޢާމަލާތްކުރުމާއި ގުޅިގެން ކަމަށެވެ.
ހަމައެއާއިއެކު، ވަކި ސަފީރަކަށް އުނދަގޫކުރުމުގެ އަމަލުތަކެއް ހިންގިކަމަށް ތުހުމަތުކޮށްފައިވާއިރު، ފުލުހުން ބުނީ، ފުލުހުންގެ އިރުޝާދުތަކަށް ތަބާނުވުމަކީވެސް ހައްޔަރުކުރުމަށް މެދުވެރިވި އެއް ސަބަބު ކަމަށެވެ.
Advertisement
This content is created and paid for by advertisers and does not involve Voice Journalists
