ފިޗުން ރާއްޖޭގެ ރޭޓިން ދަށްކުރިނަމަވެސް، ސަރުކާރުން ރާއްޖޭގެ އިޤްތިސާދު ރަނގަޅުކުރުމަށް އެޅުމަށް ނިންމާފައިވާ ފިޔަވަޅުތަކާއެކު ކުރިއަށްއޮތް ތަނުގައި ރާއްޖޭގެ ރޭޓިން ރަނގަޅުވާނޭކަމަށް ފިނޭންސް މިނިސްޓްރީން ބުނެފިއެވެ.

ފިޗުން ވަނީ ރާއްޖޭގެ ރޭޓިން "ސީސީސީ ޕްލަސް" އިން "ސީސީ" އަށް ދަށްކޮށްފައެވެ.

ރާއްޖޭގެ މާލީ ހާލަތު ހުރިގޮތާ ގުޅޭގޮތުން ފިޗުން ނެރުނު ރިޕޯޓާ ގުޅޭގޮތުން ފިނޭންސް މިނިސްޓްރީން ނެރުނު ބަޔާނެއްގައި ބުނީ، ފިޗުން އެފަދަ ރޭޓިންނެއް ރާއްޖެއަށް ދީފައިވަނީ، މިހާރު ކުރިމަތިވެފައިވާ ފިސްކަލް އަދި އެކްސްޓަރނަލް ސެކްޓަރތަކުގެ ހިރާސްތައް ހުރިކަމަށް ބެލެވޭތީ ދީފައިވާ ރޭޓިންނެއް ކަމަށެވެ.

Advertisement

ފިޗުން ފާހަގަކޮށްފައިވާ ފިސްކަލް ދާއިރާއަށާއި ބޭރުފައިސާ ހޯދުމަށްކުރިމަތިވެފައިވާ ދާއިރާތަކަށް ދާއިމީ ހައްލެއް ހޯދައިދިނުމުގެ ގޮތުން ސަރުކާރުން އާމްދަނީ އާއި ހަރަދުގެ ސިޔާސަތުތައް ރީފޯމްކޮށް މެދުރާސްތާއަށް ދަރަނި ނަގަންޖެހޭ މިންވަރު ކުޑަކުރުމަށް ފިޔަވަޅުއެޅުމަށް ތައްޔާރުވަމުންދާކަމަށް ފިނޭންސުން ބުނެއެވެ. 

އާމްދަނީ އިތުރު ކުރުމަށް ރާވާފައިވަނީ:

•       އެއަރޕޯޓް ޓެކުހާއި ފީގެ ރޭޓުތައް މުރާޖަޢާކުރުން

•       ޞިއްޙަތަށް ގެއްލުން ހުރި ބާވަތްތަކުން ނަގާ ޑިއުޓީ ބޮޑުކުރުން

•       ޖީއެސްޓީ އިދާރީ ޤާނޫނު މުރާޖަޢާކޮށް ޓެކްސް ބޭސް ފުޅާކުރުން

•       ގްރީން ޓެކުހުގެ ޜޭޓުތައް މުރާޖަޢާކުރުން

•       އިޤްތިޞާދަށް ތަފާތު ޙަރަކާތްތައް އިތުރުކުރުން

 ފިނޭންސުން ބުނީ ފިސްކަލް ސިޔާސަތުތަކަށް ގެނެވޭ ބަދަލުތަކަކީ ދައުލަތުން ދަރަނި ނަގަންޖެހޭ މިންވަރު ކުޑަކޮށް، ފިސްކަލް އަދި އެކްސްޓަރނަލް ސެކްޓަރގެ ހާލަތު ރަނގަޅުކުރުމުގެ މަގްސަދުގައި އެކުލަވާލާ ތަންފީޒުކުރުމަށް ރާވާފައިވާ ބަދަލުތަކެއް ކަމަށެވެ. މީގެ އިތުރުން ރާއްޖެއަށް ދިމާވެފައިވާ ބޭރުފައިސާގެ ދަތިތަކަށް އެކަށީގެންވާ ހައްލެއް ހޯދުމަށް އެކުވެރި ދައުލަތްތަކާއި ބައިނަލްއަޤްވާމީ މާލީ އިދާރާތަކާ ގުޅިގެން މަސައްކަތް ކުރަމުންދާކަމަށް ފިނޭންސުން ބުނެއެވެ.

ފިނޭންސުން ބުނީ ސިޔާސަތުތައް ތަންފީޒުވެ މި އަހަރާއި މެދުރާސްތާގައި ފަތުރުވެރިކަމުގެ ދާއިރާއަށާއި އިގްތިސާދަށް އަންނާނޭކަމަށް ބެލެވޭ ކުރިއެރުމާއެކު، ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކުރެވޭނެކަމަށެވެ. މިގޮތުން 2028 ވަނަ އަހަރުގެ ނިޔަލަށް ޤައުމީ އުފެއްދުންތެރިކަމުގެ ނިސްބަތުން ޖުމްލަ ދަރަނި 90 އިންސައްތައަށް ކުޑަކުރެވޭނޭ ކަމަށްވެސް ފިނޭންސުން ލަފާކުރެއެވެ.